Раніцай 19 верасня наймалодшыя каталіцкія іерархі з Беларусі, якія ўдзельнічаюць у курсе для новапрызначаных біскупаў, цэлебравалі святую Імшу ў ватыканскай базыліцы Святога Пятра і сустрэліся са Святым Айцом Папам Францішкам.
Як паведамлялася раней, у гэтым фармацыйным курсе бяруць удзел каад’ютар Гродзенскай дыяцэзіі біскуп Уладзімір Гуляй і дапаможны біскуп Пінскай дыяцэзіі Андрэй Зноска, якія прынялі біскупскае пасвячэнне сёлета.
Біскуп Зноска паведаміў Catholic.by, што падчас аудыенцыі ў Пантыфіка задаў Святому Айцу наступнае пытанне:
«Ваша Святасць! Маё імя Андрэй Зноска, я біскуп з Беларусі, невялікай краіны, якая мяжуе і з Расіяй, і з Украінай. Я быў пасвячаны толькі тыдзень таму і прашу вашай парады.
Мы не можам і не хочам памяняць нашых суседзяў: яны такія, якія ёсць. Што мы павінны рабіць, каб вайна паміж нашымі суседзямі спынілася?»
Святы Айцец сказаў у адказ, што ведае Беларусь і прасіў перадаць прывітанне для прэзідэнта Лукашэнкі.
Папа таксама памятае, што сёлета прызначыў двух біскупаў для Касцёла ў нашай краіне.
«Вы ў Беларусі добра ведаеце, што ніколі нельга закрываць дзверы для перагавораў, што трэба трымаць іх адкрытымі», — сказаў пастыр паўсюднага Касцёла. Папа Францішак падкрэсліў, што толькі будучы гатовымі слухаць і чуць адны другіх можна дайсці да добрых вынікаў.
У канцы свайго адказу на пытанне наймалодшага біскупа з Беларусі Святы Айцец заахвоціў ніколі не губляць надзею і верыць у пераможную моц малітвы: толькі такі шлях да міру ён бачыць для веруючых людзей.
