24 лістапада ў балівійскім горадзе Ла-Пас, які з’яўляецца фактычнай сталіцай гэтай краіны, размешчанай у цэнтральнай частцы Паўднёвай Амерыкі, адбыўся напад на сядзібу мясцовага епіскапату.
Як паведаміла Каталіцкае інфармацыйнае агенцтва КАІ, выбуховая прылада спрацавала пры ўваходзе ў будынак, дзе знаходзіцца офіс Канферэнцыі біскупаў Балівіі. У выніку выбуху быў пашкоджаны будынак, але абышлося без ахвяраў.
Епіскапат апублікаваў відэа з камеры назірання, на якім відаць, як невядомы з каптурам на галаве і ў пальчатках пакінуў перад дзвярыма нейкі прадмет і ўцёк. Праз 20 секунд прагучаў выбух.
Адказнасць за напад ніхто на сябе не ўзяў, але, як адзначае місіянерскае агенцтва Fides, ён можа быць звязаным з пазіцыяй Касцёла адносна нядаўняга здарэння з 11-гадовай дзяўчынкай, якая была згвалчана і зацяжарыла.
Балівійскія біскупы заклікалі да абароны жыцця як ахвяры гвалту, так і яе дзіцяці. Яны нагадалі, што нікога нельга прымушаць рабіць аборт, нават у выпадку згвалтавання, паколькі «аборты ў Балівіі з’яўляюцца злачынствам».
Пасля гэтай заявы група дэманстрантаў сабралася 27 кастрычніка каля сядзібы епіскапату і размалявала сцены фарбай.
