У італьянскім Марыйным санктуарыі ў мясцовасці Аропа, што ў П’емонце, 29 жніўня адбудзецца чарговая каранацыя фігуры «Чорнай Мадонны», якую мясцовыя вернікі ўшаноўваюць як Каралеву Гор і кожныя 100 гадоў нанава карануюць.
Як паведаміла Каталіцкае інфармацыйнае агенцтва КАІ, Папу Францішка на ўрачыстасці прадставіць дэкан Калегіі кардыналаў 87-гадовы кардынал Джаванні Батыста Рэ.
Гэты п’емонцкі санктуарый мае багатую гісторыю і звязаныя з ім традыцыі.
Раз у пяць гадоў сюды прыбывае начная пілігрымка з Фантэнмора, а з 1620 года кожныя 100 гадоў тутэйшая фігура «Чорнай Мадонны» нанава карануецца.
Гэта павінна было адбыцца летась, аднак з-за пандэміі каранавірусу абрад быў перанесены на год пазней.
Гэтае месца культу Маці Божай, размешчаная на вышыні 1159 метраў над узроўнем мора ў італьянскіх Альпах, не мае такой папулярнасці, як Фаціма ці Люрд. Большасць пілігрымаў у ім складаюць італьянцы. Адным з іх у мінулым часта бываў благаслаўлёны студэнт П’ер Джорджо Фрасаці (1901–1925 гг.). Акрамя таго, тут праходзіць адзін з этапаў велагонкі Джыро Д’Італія, і ў санктуарый збіраецца шмат велапілігрымаў.
Згодна з традыцыяй, санктуарый Маці Божай Каралевы Гор у Аропе быў заснаваны ў IV стагоддзі святым Эўзэбіем.
Легенда кажа, што апостал далін у ваколіцах Б’еллі прынёс з сабой гатычную фігуру Чорнай Мадонны, якая павінна была пакласці канец культам кельцкіх бостваў.
У 1207 годзе гэтае месца згадваецца ў буле Папы Інацэнта ІІ, але сапраўдная папулярнасць прыйшла да яго ў эпоху барока, калі сабаўдзкія князі скіравалі ў Альпы вядомых архітэктараў. Створаныя імі аб’екты да сёння з’яўляюцца аднымі з найбольш пазнавальнымі ў сталіцы П’емонта Турыне. Але самым вядомым будынкам на вялікай тэрыторыі санктуарыя ў Аропе стала пабудаваня тут у ХХ стагоддзі копія базылікі святога Пятра.
У старой базыліцы XVII стагоддзя знаходзіцца капліца «Чорнай Мадонны».
Вакол яе размешчаны яшчэ 12 капліц, аздобленыя фігурамі, што прадстаўляюць жыццё Маці Божай.
Гэтае месца ўваходзіць у склад італьянскага запаведніка «Дзевяці святых гор» (Sacri Monti), які занесены ў спіс сусветнай культурнай спадчыны ЮНЕСКА.
