11 лістапада ў парафіі святога Антонія Падуанскага ў Віцебску падчас святой Імшы адбудзецца пасвячэнне абраза Марыі, Маці Касцёла.
Як паведамляецца на сайце Catholicnews.by, пасвячэнне абраза здзейсніць біскуп Віцебскі Алег Буткевіч падчас святой Імшы а 18-й гадзіне.
Да прызначэння пастырам Віцебскай дыяцэзіі, іерарх 10 гадоў быў пробашчам у гэтай парафіяльнай супольнасці і прычыніўся да перабудовы колішняга дома культуры ў каталіцкую святыню.
Цяперашні пробашч парафіі святога Антонія Падуанскага ксёндз канонік Сяргей Сурыновіч ад імя парафіянаў шчыра запрашае ўсіх ахвотных узяць удзел у супольнай малітве і знаёміць з гісторыяй іканаграфічнага тыпу, што сёння мае назву «Маці Касцёла».
Абраз Марыі, вядомы сёння як Mater Ecclesiæ (лац. «Маці Касцёла»), быў напісаны на калоне ў старажытнай базыліцы, пабудаванай у часы імператара Канстанціна на месцы пахавання святога Пятра на Ватыканскім пагорку ў Рыме. Таму напісаная на пачатку XV стагоддзя выява Маці Божай з Дзіцяткам Езусам на руках вядомая як «Мадонна калоны».
Тытул Mater Ecclesiæ быў нададзены Найсвяцейшай Панне Марыі Папам Паўлам VI у 1964 годзе напрыканцы трэцяй сесіі Другога Ватыканскага Сабору. Галоўным абгрунтаваннем тытула «Маці Касцёла» з’яўляецца Божае мацярынства Марыі і праўда пра Касцёл як Містычнае Цела Хрыста.
21 лістапада 1964 года Другі Ватыканскі Сабор абвясціў Дагматычную канстытуцыю пра Касацёл Lumen gentium («Святло народам»). У гэты дзень Папа цэлебраваў святую Імшу разам з 24-а біскупамі з найбуйнейшых Марыйных санктуарыяў свету.
Падчас цэлебрацыі Павел VI урачыста абвясціў Марыю Маці Касцёла, устанавіўшы такім чынам новы Марыйны тытул, які ўвайшоў у Ларэтанскую літанію.
Літургічны ўспамін Найсвяцейшай Панны Марыі, Маці Касцёла, адзначаецца на наступны дзень пасля нядзелі ўрачыстасці Спаслання Духа Святога, што перадае сэнс і сімволіку тытула: паказвае мацярынскі клопат Марыі пра Касцёл, які толькі нараджаецца, і трывае ва ўсе часы. Марыя непарыўна звязана з Касцёлам праз Божае мацярынства, Яна прабывала ў малітве з апосталамі падчас Пяцідзясятніцы і апякуецца іх наступнікамі на працягу ўсёй гісторыі яго існавання да нашых дзён. Марыя з’яўляецца Маці ўсяго Касцёла, але таксама Маці кожнага з хрысціянаў, членаў Містычнага Цела Хрыста.
У 1980 годзе падчас Міжнароднага кангрэса і сустрэчы студэнтаў у Ватыкане адзін з яе ўдзельнікаў задаў пытанне Яну Паўлу ІІ пра адсутнасць на плошчы святога Пятра выява Маці Божай. Гэтае пытанне мела свае наступствы: Папа даў наказ змясціць выяву Багародзіцы. Праект быў распрацаваны, але яго ажыццяўленню перашкодзіў замах на жыццё Папы 13 мая 1981 года.
Калі Ян Павел ІІ вярнуўся ў Ватыкан з клінікі Джэмэллі, была вывучана новая магчымасць размяшчэння бачнага знаку на плошчы святога Пятра, каб увекавечыць балючую старонку ў гісторыі Касцёла, а таксама каб падкрэсліць знак нябеснай апекі Марыі.
Ян Павел ІІ быў перакананы і казаў, што менавіта Маці Божая выратавала яго падчас замаху, таму ўзнікла ідэя размяшчэння Марыйнай мазаікі ў замураваным акне Апостальскага палаца на плошчы святога Пятра на ўзор фрэскі Марыі Mater Ecclesiæ.
Мазаіка была створана ў перыяд з лістапада па снежань 1981 года, праз шэсць месяцаў пасля замаху.
8 снежня 1981 года, ва ўрачыстасць Беззаганнага Зачацця Найсвяцейшай Панны Марыі, Ян Павел ІІ перад малітвай «Анёл Панскі» пасвяціў мазаіку Багародзіцы.
Марыя, Маці Касцёла з’яўляецца апякункай Віцебскага катэдральнага капітула.
