Кіраўнік Сіра-Малабарскага Каталіцкага Касцёла кардынал Мар Георг Аленчэры заклікаў урад Індыі, каб доступ да медыцынскага кіслароду лічыўся адным з асноўных правоў чалавека.
На думку арцыбіскупа архідыяцэзіі Эрнакулам-Ангамалі, улады павінны зрабіць усё магчымае, каб забяспечыць кіслародам хворых на каранавірус людзей, якія змагаюцца за жыццё ў шпіталях. Пра гэта паведамляе Каталіцкае інфармацыйнае агенцтва КАІ.
«Звычайна мы кажам пра ежу, адзенне і дах над галавою як пра асноўныя чалавечыя патрэбы, якія ўлады павінны гарантаваць грамадству. Сёння з прычыны COVID-19 чалавечае жыццё знаходзіцца ў вялікай небяспецы», — сцвердзіў іерарх, указаўшы на праблему доступу да медыцынскага кіслароду, неабходнага хворым, каб выжыць.
«Безумоўным абавязкам ураду з’яўляецца забеспячэнне медыцынскім кіслародам усіх шпіталяў і медыцынскіх цэнтраў па ўсёй Індыі», — падкрэсліў старшыня Рады Каталіцкіх Біскупаў штата Керала.
Іерарх дадаў, што медыцынскі кісларод не можа быць таварам, з якога пасярэднікі будуць мець прыбытак.
«Многія не могуць сабе дазволіць набываць медыцынскі кісларод на вольным рынку з-за высокіх коштаў. Карыстанне медыцынскім кіслародам павінна лічыцца асноўнай патрэбай, якая павінна быць даступнай і бясплатнай для жыхароў Індыі»,— адзначыў кардынал.
Улады Індыі, як сцвердзіў іерарх, павінны выкарыстаць усе свае сродкі, у тым ліку чартарныя рэйсы, каб даставіць медыцынскі кісларод з-за мяжы ва ўсе штаты краіны, якія маюць у ім патрэбу.
У той жа час 76-гадовы кардынал адзначыў, што Касцёл цэніць усё зробленае за гэты час цэнтральным урадам і кіраўніцтвам штатаў для змагання з наступствамі пандэміі.
На сёння з 1,4 мільярдаў жыхароў Індыі ў 17,3 мільёнаў дыягнаставана каранавірусная інфекцыя. Толькі за 25 красавіка было зафіксавана 350 тысяч новых інфіцыяваных. Памерла каля 195 тысяч хворых на COVID-19.
