12 кастрычніка сёлета адзначаецца Сусветны дзень хоспіснай і паліятыўнай дапамогі, і з гэтай нагоды Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, запрашае духавенства і вернікаў Касцёла ў Беларусі да супольнай малітвы.
Дарагія браты і сёстры!
Заўтра, у Сусветны дзень паліятыўнай і хоспіснай дапамогі, мы злучымся ў адну вялікую сям’ю, каб асаблівым чынам маліцца за тых, хто патрабуе нашай падтрымкі і любові. Гэты дзень нагадвае нам, наколькі важна праяўляць клопат да людзей, якія адчуваюць боль і самотнасць у сваім жыцці.
Мы ведаем, што паліятыўная і хоспісная дапамога — гэта не толькі медыцынскае абслугоўванне, але і шанц дарыць людзям годнасць, спакой і цеплыню ў апошнія дні іх жыцця. Кожны з нас можа стаць крыніцай святла і надзеі.
У гэты дзень, які адзначаецца ў другую суботу кастрычніка, я запрашаю вас далучыцца да малітвы. Малітва — гэта наша духоўная повязь, якая дае сілы нам і тым, каму мы хочам дапамагчы. Няхай кожная вашая думка і малітва будзе скіравана на суцішэнне болю, на праяўленне спачування, на падтрыманне медыцынскіх работнікаў і валанцёраў.
Памятайце, што ваша падтрымка, увага і добрыя справы дапамагаюць тым, хто знаходзіцца ў хоспісе або атрымлівае паліятыўную дапамогу.
Давайце разам будаваць свет, дзе кожны чалавек будзе адчуваць, што ён не самотны і мае шанц на дастойнае жыццё нават у самых складаных абставінах.
Няхай нас напоўняе дабро, спагадлівасць і любоў адзін да аднаго. Няхай гэтыя каштоўнасці стануць нашым падмуркам у працы з людзьмі, якія маюць патрэбу ў нашай дапамозе.
З благаслаўленнем і малітвай,
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
г. Мінск, 11 кастрычніка 2024 г.
