Міжнародная арганізацыя Save the Children сабрала сведчанні жахлівых злачынстваў, якія здзяйсняюць ісламісты ў Мазамбіку: сведкі казалі, што яны сякуць галовы нават дзецям.
Польская рэдакцыя парталу Vatican News нагадвае, што насілле ў правінцыі Кабу-Дэлгаду не спыняецца з 2017, калі рэгіёнам завалодалі тэрарысты, звязаныя з тэрарыстычнай арганізацыяй «Ісламская дзяржава».
За гэты час яны прымусілі каля 800 тыс. хрысціянаў пакінуць тэрыторыю Кабу-Дэлгаду, якая з’яляецца найбяднейшай і адной з самых адсталых правінцый Мазамбіка.
Тут вельмі высокі ўзровень непісьменнасці і моцны недахоп прадуктаў, хоць гаворка ідзе пра самыя багатыя рэсурсамі землі краіны: золатам, рубінамі і натуральным газам.
«З-за дзеянняў ісламістаў сітуацыя ў рэгіёне склалася вельмі драматычная. Людзі не маюць што есці, не хапае пітной вады і нават асноўных лекаў», — распавёў Ватыканскаму радыё Філіпо Унгара з арганізацыі Save the Children.
«Эскалацыя насілля адбывалася там на працягу апошняга года; паведамляецца пра ўсё большую колькасць нападаў на мірнае насельніцтва. Ісламісты сеюць тэрор дэманстрацыйнымі забойствамі праз адсячэнне галавы. Мы можам гэта пацвердзіць, таму што размаўлялі з сем’ямі бежанцаў.
Адна маці распавяла нам, што бачыла, як ісламісты адсеклі галаву яе 12-гадоваму сыну ў той час, калі яна спрабавала ўратаваць іншых трох дзяцей і хавалася з імі ў лесе, бо іх вёску спалілі, — кажа прадстаўнік арганізацыі па абароне дзяцей. —
Мы ведаем, што, на жаль, таксама дзеці ўсё часцей становяцца ахвярамі жахлівага насілля. Іх гвалтам прымушаюць станавіцца баевікамі, а калі яны супраціўляюцца, іх забіваюць. Разгул насілля паглыбляе беднасць і харчовы крызіс у гэтым і без таго бедным рэгіёне. Насельніцтву Кабу-Дэлгаду пагражае голад, у іх літаральна нічога няма», — сцвярджае Філіпо Унгара.
Жыхароў правінцыі шмат разоў падтрымліваў Папа Францішак, які звяртаўся да міжнароднай супольнасці з заклікам пакласці канец крызісу ў рэгіёне. Падчас свайго падарожжа ў Мазамбік ён звярнуў увагу на праблему раскрадання натуральных рэсурсаў краіны і на цярпенне людзей, якое з’яўляецца вынікам гэтага.
Галоўнай прычынай канфлікту ў Кабу-Дэлгаду з’яўляюцца багацці гэтай зямлі, а ўжо пад гэта падводзяцца ідэалагічныя платформы, каб захапіць кантроь над рэгіёнам.
У снежні Святы Айцец падараваў 100 тыс. еўра на дапамогу бежаннцам. Гэтыя грошы былі прызначаны на будаўніцтва двух медыцынскіх цэнтраў для тых, хто бяжыць ад ісламскіх тэрарыстаў.
