![](/3/images/news/2021/02/2021-02-26-sdjkhuj.jpg)
З 22 па 24 лютага праходзіла Надзвычайнае пленарнае пасяджэнне Канферэнцыі біскупаў Францыі, прысвечанае адказнасці за выпадкі выкарыстання непаўналетніх, якія мелі месца ў французскім Кацёле.
Як паведамляецца ў справаздачы з пасяджэння, апублікаваным на партале епіскапату Францыі eglise.catholique.fr, яно цалкам праходзіла ў рэжыме відэасувязі. Палова часу была прысвечана выслухоўванню трох дзясяткаў іншых асоб: ахвяраў выкарыстання, удзельнікаў працоўных груп, створаных у лістападзе 2018 года, супрацоўнікаў палат прыёму і выслухоўвання, розных касцёльных адказных.
Тэма выкарыстанняў у Касцёле разглядалася ў розных аспектах: псіхасацыяльным, філасофскім, тэалагічным, біблійным, гістарычным.
Увечары ў панядзелак удзельнікі пасяджэння нават паглядзелі тэатральную п’есу Pardon? — «Прабачэнне?», — якая была для гэтага спецыяльна запісаная.
У справаздачы падкрэсліваецца, што цэнтральную ролю ў асэнсаванні гэтай складанай тэмы адыгралі людзі, якія сталі ахвярамі выкарыстання.
Падчас Надзвычайнага пленарнага пасяджэння біскупы засяродзіліся на адказнасці перад абліччам мінулага, сучаснасці і будучыні, вызначаючы кірунак наступных крокаў.
Было вырашана, што пленарнае пасяджэнне, прызначанае праз месяц, зоймецца распрацоўкай доўгатэрміновага плану канкрэтных дзеянняў з мэтай вывесці Касцёл у Францыі з крызісу выкарстанняў і злоўжывання ўладай.
Чакаецца таксама, што ў кастрычніку будзе апублікаваны спецыяльны даклад Незалежнай камісіі па сексуальных выкарстаннях у Касцёле.