Прадстаўнікі 25-і краін Еўропы, у тым ліку і Беларусі, сабраліся 13–15 лістапада ў Рыме на канферэнцыі, прысвечанай намаганням Касцёла па абароне найбольш уразлівых.
Арганізатарам канферэнцыі, на якой Касцёл у Беларусі прадстаўляе старшыня камісіі па справах абароны малалетніх пры ККББ ксёндз канонік Дзмітрый Пухальскі, стала Папская камісія па абароне непаўналетніх.
Як паведамляе Беларуская рэдакцыя парталу Vatican News, форум сабраў каля сотні ўдзельнікаў з розных еўрапейскіх краін: біскупаў, святароў і свецкіх, у тым ліку асобаў, пацярпелых ад злоўжыванняў.
Яна стала працягам папярэдняй канферэнцыі на тэму: «Наша агульная місія — абараняць Божых дзяцей», якая ў верасні 2021 года прайшла ў Варшаве (Польшча).
Святы Айцец даслаў удзельнікам форуму ліст, у якім выказаў спадзяванне на тое, што яны створаць сетку для абмену інфармацыяй і падтрымаюць адзін аднаго ў намаганнях па стварэнні эфектыўных і ўстойлівых праграм па абароне непаўналетніх. Пантыфік заахвоціў удзельнікаў стварыць ініцыятывы, якія «прынясуць суцяшэнне і дапамогу пацярпелым як знак клопату Касцёла пра справядлівасць, аздараўленне і паяднанне».
Папа пажадаў канферэнцыі стаць «крыніцай плённых ідэй» і «зрабіць унёсак у стварэнне больш бяспечнага і спагадлівага Касцёла».
