Праект «Святло свабоды» стартаваў у вязніцы Пальяна ў дыяцэзіі Палестрына, непадалёк ад Рыма. Удзельнікамі праекту з’яўляюцца асуджаныя, якія ўласнаручна будуць размалёўваць пасхалы, прызначаныя для капліц у італьянскіх карных установах.
Як паведамляе польская рэдакцыя парталу Vatican News, акцыю ініцыяваў інспектар Італьянскіх турэмных капліц разам з мастацкім таварыствам Liberi nell’arte.
Праект «Святло свабоды» — гэта элемент маштабнай праграмы італьянскага турэмнага ведамства, мэта якога заключаецца ў тым, каб праз мастацтва спрыяць рэсацыялізацыі вязняў.
Праект базуецца на сацыяльным вучэнні Касцёла.
«Гэта ўсяго толькі дробны элемент працэсу рэінтэграцыі з грамадствам, але вельмі істотны. Язык мастацтва вучыць заўважаць свае пачуцці», — адзначыў кс. Рафаэле Грымальдзі, генеральны інспектар італьянскіх турэмных капеланаў і аўтар ініцыятывы.
Як падкрэсліў кс. Грымальдзі, было вырашана заняцца менавіта пасхаламі, «каб паказаць, што Хрыстус з’яўляецца святлом і што толькі Ён паказвае шлях да сапраўднай свабоды, зрывае кайданы зла і падымае тых, хто ўпаў; вяртае чалавецтву, пакрытаму цемрай, святло міласэрнасці і чуласці».
На думку святара, пакаранне праз пазбаўленне волі не можа абмяжоўвацца толькі ізаляцыяй асобы ад грамадства: яно павінна мець таксама пазітыўны аспект.
Як дадаў генеральны інспектар, гэты праект «дапамагае лячыць раны вязняў, запаўняць пустку, якая часта ў іх з’яўляецца».
У 2017 годзе Папа Францішак наведаў вязніцу ў Пальяна, дзе падчас цэлебрацыі святой Імшы Вячэры Пана ў Вялікі чацвер абмыў ногі вязням.
