У нядзелю 14 лютага ў Санкт-Пецярбургу (Расія) зноў сталі цэлебравацца святыя Імшы на беларускай мове.
Як паведамляе blstv.eu, першая за доўгі час святая Імша на беларускай мове цэлебравалася ў парафіі Унебаўзяцця Найсвяцейшай Панны Марыі, у капліцы благаслаўлёнага Тэафілюса Матулёніса, які ў 1928–1943 гадах быў дапаможным біскупам Магілёўскім.
Цэлебраваў Эўхарыстыю пробашч парафіі ксёндз Януш Прусіноўскі, які раней пэўны час нёс служэнне ў беларускім Сянно і з тых часоў ведае беларускую мову.
З ініцыятывай цэлебрацыі Імшы па-беларуску выступілі мясцовыя беларусы каталіцкага веравызнання.
Падчас Эўхарыстыі вернікі маліліся за памерлую 5 лютага Тэрэзу Шырму, якая брала актыўны ўдзел у жыцці парафіі, выдавала па-беларуску газету «Krynica» і вяла праграмы на беларускай мове на пецярбуржскім хрысціянскім радыё «Марыя».
Цэлебрацыі Імшы па-беларуску плануецца праводзіць кожную другую нядзелю. Ва ўспамін святога Валянціна ў ёй узялі ўдзел каля 20 чалавек.
