Арцыбіскуп Неапаля Дамэніко Баталья, які ўступіў на сваю пасаду 2 лютага, мае намер рашуча выступаць супраць мафіёзнай структуры «камора» і кожнай формы арганізаванай злачыннасці.
Як сказаў іерарх на наступны дзень пасля ўступлення на пасаду ў інтэрв’ю папулярнаму італьянскаму штодзённіку Avvenire, «Касцёл пакліканы адыграць прарочую ролю ў гэтай барацьбе». Арцыбіскуп Баталья, чые словы перадае Каталіцкае інфармацыйнае агенцтва КАІ, дадаў, што ў гэтай справе неабходна ўзаемадзейнічаць з дзяржаўнымі органамі і весці яе ва ўсіх сферах.
На думку арцыпастыра, эканамічныя наступствы каранавіруснага лакдаўну дазволілі «вірусу мафіі» лягчэй пранікаць у «раны сацыяльнай несправядлівасці».
Мафія абяцае свабоду і хуткі прыбытак, а насамрэч трымае людзей у сваіх кіпцюрах, сцвярджае новы арцыбіскуп Неапаля.
Ён адзначыў, што адзінай зброяй Касцёла і дзяржавы ў гэтай барацьбе з’яўляецца давер. Калі яго не ўдасца вярнуць, «камора» будзе надалей уцягваць у сваю сістэму ўсё больш моладзі.
«Вяртанне даверу магчымае толькі дзякуючы канкрэтнай дзейнасці на карысць людзей», — падкрэсліў іерарх.
Арцыбіскуп Дамэніко Баталья, якому 20 студзеня споўнілася 58 гадоў, быў прызначаны на гэтую пасаду ў снежні мінулага года. Яго папярэднікам на Неапалітанскай катэдры быў сённяшні кардынал Крэшчэнцыё Сэпэ, які кіраваў архідыяцэзіяй з 2006 года. Увесь італьянскі рэгіён Кампаньі, сталіцай якой з’яўляецца Неапаль, вядомы вострымі сацыяльнымі праблемамі і вялікай актыўнасцю крымінальнага свету.
Цікава, што новы неапалітанскі арцыбіскуп мае вельмі «ваяўнічае» прозвішча: Battaglia у перакладзе з італьянскай мовы азначае «змаганне». Як вынікае з яго інтэрв’ю Avvenire, сваё змаганне іерарх плануе весці з найбольшым сацыяльным злом у сваёй архідыяцэзіі.
