«Жыллё застаецца для многіх еўрапейцаў мэтай, якую цяжка дасягнуць і ўтрымаць», — звяртаюць увагу аўтары Дасье на тэму заканадаўчага аналізу рэалізацыі на еўрапейскім кантыненце права на жыллё.
Як паведамляе беларуская рэдакцыя парталу Vatican News, аналіз падрыхтавала дабрачынная каталіцкая арганізацыя Caritas у Італіі, прымеркаваўшы яго да 31-й гадавіны падзення Берлінскай сцяны і 70-годдзя Дэкларацыі Шумана.
«Мы правялі, магчыма, крыху рызыкоўную паралель, якая, аднак, адлюстроўвае падзенне адной сцяны і адсутнасць хатніх сцен, якія маглі б вярнуць людзям годнасць», — патлумачыў віцэ-старшыня дабрачыннай арганізацыі Паоло Бэчэгата ў інтэрв’ю Vatican News.
«Больш за 23 мільёны сем’яў, каля 10,4% насельніцтва Еўрасаюза, трацяць звыш 40% заробку на ўтрыманне ўласнага жылля, і амаль дзевяць мільёнаў сем’яў жывуць у нездавальняючых умовах»,
— сцвярджаецца ў Дасье. З яго вынікае, што ў Еўропе налічваецца 700 тысяч бяздомных; за дзесяць гадоў гэтая лічба павялічылася на 70%.
У Італіі больш за 1,8 млн сем’яў знаходзяцца ва ўмовах абсалютнай беднасці. Неабходнасць арэндаваць жыллё толькі пагаршае сітуацыю. У краіне 51 тыс. бяздомных, умовы якіх пагоршыліся яшчэ больш у сувязі з пандэміяй каранавірусу.
Сёння дзяржаўнае жыллё Італіі складае 4% нацыянальнага жыллёвага фонду і такім чынам ахоплівае мінімальную долю насельніцтва — пятую частку рынку арэнднага жылля. Гэта адзін з самых нізкіх паказчыкаў у Еўропе.
«Чатыры мільёны маладых людзей ва ўзросце ад 25 да 39 гадоў усё яшчэ жывуць у бацькоўскіх дамах; чатыры мільёны замежных работнікаў арэндуюць жыллё»,
— адзначаюць аналітыкі італьянскай Caritas.
У межах еўрапейскага заканадаўства права на жыллё ўваходзіць у выключную кампетэнцыю кожнай асобна ўзятай дзяржавы. «Па гэтай прычыне сістэма дзяржаўнай жыллёвай палітыкі аказваецца неаднароднай, а ўзровень даступнасці жылля — нераўнамерны. Тым не менш, у Еўропе назапашаны багаты інавацыйны вопыт, з якога можна пачарпнуць карысныя кірункі працы, каб спрыяць лепшаму выкананню фундаментальнага права на годнае жыллё», — падсумавалі аўтары дакумента.
