17 лістапада ў Касцёле будзе адзначацца Сусветны дзень бедных, устаноўлены Папам Францішкам восем гадоў таму, каб прыцягнуць увагу на сітуацыі людзей у нястачы, і заахвоціць дапамагаць ім.
Як паведаміла Беларуская рэдакцыя парталу Vatican News, сёлетняя тэма ініцыятывы: «Малітва беднага дасягае Бога» (Сір 21, 5).
Прыклад салідарнасці з беднымі дасць сам Святы Айцец.
Раніцай ён узначаліць цэлебрацыю Імшы на плошчы святога Пятра, перад якой благаславіць трынаццаць ключоў — сімвал Юбілейнага праекту трынаццаці дамоў. У яго межах арганізацыя Famvin Homeless Alliance, якая аб’ядноўвае духоўных паслядоўнікаў святога Вінцэнта дэ Поля ў трынаццаці краінах свету, пабудуе дамы для маламаёмных сем’яў. Будаўніцтва трынаццаці дамоў у Сірыі будзе прафінансавана непасрэдна Святым Пасадам. Ініцыятыва будзе рэалізавана на працягу Святога года дзякуючы шчодрым ахвяраванням адной вялікай страхавой кампаніі.
Пасля літургіі Папа Францішак сустрэнецца з беднымі ў ватыканскай Зале Паўла VI на супольным абедзе, арганізаваным Дыкастэрыяй па міласэрным служэнні пры падтрымцы Італьянскага аддзялення Чырвонага Крыжа. У якасці падарунку ўсе госці атрымаюць заплечнікі з прадуктамі харчавання і сродкамі гігіены.
На працягу тыдня, які папярэднічае Сусветнаму дню бедных, ватыканскі дабрачынны медыцынскі цэнтр Маці Божай Міласэрнасці будзе працаваць па падоўжаным графіку.
Васямнаццаць спецыялістаў у розных галінах медыцыны будуць аказваць бясплатныя паслугі патрабуючым з 8.00 да 17.00. Дзякуючы гэтаму людзі, якія жывуць у цяжкіх умовах, атрымаюць магчымасць прайсці абследаванне і вакцынацыю, атрымаць лекі і неабходную дапамогу.
З нагоды Сусветнага дня бедных Дыкастэрыя па міласэрным служэнні ў супрацоўніцтве з рымскімі парафіямі і згаданай страхавой кампаніяй дапаможа маламаёмным сем’ям аплаціць квітанцыі за камунальныя паслугі.
Дыкастэрыя па евангелізацыі, у сваю чаргу, распрацавала спецыяльны душпастырскі дапаможнік для каталіцкіх супольнасцяў, мэта якога дапамагчы правесці Сусветны дзень бедных у салідарнасці з людзьмі, якія перажываюць матэрыяльныя цяжкасці. Дакумент, перакладзены на шэсць моваў, даступны на сайце ведамства evangelizatio.va.
