У сталіцы Славакіі Браціславе будзе адбудавана вежа касцёла Маці Божай Снежнай, разбураная падчас панавання ў краіне камуністычнага рэжыму.
Як са спасылкай на славацкія СМІ 19 кастрычніка паведаміла Каталіцкае інфармацыйнае агенцтва КАІ, рэстаўрацыяй помніка сакральнай архітэктуры займаецца камітэт пад кіраўніцтвам былога еўракамісара і славацкага міністра Яна Фігеля у супрацоўніцтве з Браціслаўскай архідыяцэзіяй і ордэнам дамініканаў.
50-метровая вежа святыні на Кальварыйскім узгорку ў паўночнай частцы Старога горада «калола вока» прасавецкім уладам краіны, і ў 50-я гады мінулага стагоддзя яе спачатку часткова разабралі, а потым канчаткова разбурылі.
Гісторыя святыні, якую ў народзе называюць «касцёлам без вежы», пачынаецца ў XVIII стагоддзі. Падчас заразы, што шалела ў 1712 годзе, жыхар Браціславы Ян Лаўэрман даў зарок пабудаваць капліцу ў гонар Маці Божай за ацаленне яго сям’і. Фундаваная ім каменная копія фігуры Багародзіцы з аўстрыйскага санктуарыя ў Марыяцэлі цяпер знаходзіцца ў галоўным алтары касцёла.
У 1824 годзе з увагі на вялікую колькасць пілігрымаў, якія сюды прыбывалі з розных мясцін, замест капліцы быў пабудаваны касцёл.
Патрэба ў новай, большай святыні ўзнікла ў сувязі з інтэнсіўнай забудовай тэрыторыі вакол цяперашняга цэнтральнага вакзала Браціславы, і невялікі касцёл Маці Божай Снежнай стаў цэнтрам новай парафіі, якой апекаваліся айцы францішкане.
Будаўніцтва было распачата падчас Другой сусветнай вайны ў 1943 годзе, а завяршылася толькі пасля яе заканчэння ў 1948 годзе, калі да ўлады ўжо прыйшлі камуністы. Паколькі ў той час яшчэ вяліся будаўнічыя працы ўсярэдзіне касцёла, замест асвячэння адбылося толькі благаслаўленне святыні.
Падсветленая ў цемры касцёльная вежа, якая павінна была стаць новай архітэктурнай дамінантай сталіцы Славакіі, «калола вочы» новаму рэжыму.
Калі непадалёк ад Кальварыйскага ўзгорку быў пастаўлены помнік палеглым падчас вызвалення Браціславы ад нацыстаў савецкім жаўнерам, 50-метровую касцёльную вежу як «канкурэнтку» часткова разабралі, а ў 1959 годзе цалкам разбурылі.
Пасля «Аксамітнай рэвалюцыі» 1989 года парафія была аддадзена пад апеку айцам дамініканам, але дамоўленасць паміж дзяржавай і Касцёлам адносна перадачы ўсяго комплексу адкладалася з-за недахопу грошай.
Толькі ў сярэдзіне верасня гэтага года арцыбіскуп Браціслаўскі Станіслаў Зваленскі здзейсніў асвячэнне касцёла.
Як сказаў журналістам Ян Фігель, адзінае, што засталося дарабіць, — гэта адбудаваць вежу святыні.
«На званіцу і платформу будзе ўсталяваны ліфт.
Гэта адначасова стане сімвалам узнясення да Марыі і да крыжа, таму што на вяршыні будзе змешчана фігура Маці Божай Балеснай, Апякункі Славакіі», — дадаў кіраўнік камітэту па адбудове вежы касцёла ў Браціславе.
