У сувязі з абвяшчэннем у Чэхіі надзвычайнай сітуацыі біскуп Пльзеньскай дыяцэзіі Томаш Голуб паўторна запусціў спецыяльны нумар, на які прымае званкі, звязаныя з пандэміяй COVID-19.
Як паведамляе Каталіцкае інфармацыйнае агенцтва КАІ, жыхары дыяцэзіі могуць падзяліцца з іерархам сваімі клопатамі і радасцямі. Лінія дзейнічае з панядзелка па пятніцу з 11 да 12 гадзін. Таксама можна ў любы час дасылаць SMS. На іх біскуп абяцаў адказаць у вольны час.
Біскуп Томаш Голуб устанавіў прамую тэлефонную лінію падчас першай хвалі пандэміі каранавірусу ў сакавіку.
На працягу некалькіх месяцаў ён размаўляў з сотнямі людзей па тэлефоне або праз SMS.
Сам іерарх захварэў на каранавірус у верасні.
«Я разумею вялікі цяжар і складанасць гэтай сітуацыі. Многія людзі знаходзяцца на каранціне і не могуць устанавіць кантакты з блізкімі, баяцца іх, многія не могуць працаваць. Маючы абмежаваныя магчымасці, я хацеў бы дапамагчы і выслухаць тых, хто перажывае якіясьці цяжкасці і павінен гэтым з кімсьці падзяліцца. Таму я зноў запусціў гэтую лінію, таму прысвячаю свой час і гатовы слухаць. Калі б гэта дапамагло хаця б аднаму чалавеку, гэта мае сэнс», — сказаў Пльзеньскі біскуп.
Ён дадаў, што вельмі хоча, каб гэтая лінія была даступнай для кожнага, і не мае значэння, лічыць той чалавек сябе веруючым ці не.
«Я з задавальненнем выслухаю кожнага, хто мне тэлефануе», — запэўніў біскуп Томаш Голуб.
