З-за пандэміі будаўніцтва славутай базылікі Sagrada Família (Святой Сям’і) у Барселоне не будзе скончана ў 2026 годзе, як планавалася. Распачатае ў 1882 годзе будаўніцтва павінна было завяршыцца ў сотую гадавіну смерці архітэктара Антоніо Гаўдзі, аўтара яе праекту.
Як паведамляе Каталіцкае інфармацыйнае агенцтва КАІ, будаўнічыя працы, прыпыненыя ў сакавіку гэтага года, будуць адноўлены ў бліжэйшыя тыдні. Але яны будуць праводзіцца больш павольна, чым да гэтага часу, па фінансавых прычынах. Сродкі на будаўніцтва святыні паступаюць толькі ад вернікаў і з продажу білетаў для турыстаў, колькасць якіх у сувязі з пандэміяй значна паменшылася.
Пакуль грошай хапае на тое, каб скончыць будаўніцтва высокай вежы Маці Божай — адной з 18 вежаў, якія запланавана зрабіць у базыліцы.
З 2005 г. Sagrada Família, якая з’яўляецца самым папулярным сярод турыстаў знакамітым месцам іспанскай Барселоны, знаходзіцца ў Спісе аб’ектаў сусветнай культурнай спадчыны ЮНЕСКА. У 2010 г. базыліку, будаўніцтва якой было яшчэ не скончана, асвяціў Папа Бэнэдыкт XVI.
