1 верасня дзяржсакратар ЗША Майк Пампеа змясціў у сваім акаўнце ў Твітары запіс у падтрымку кіраўніка беларускага каталіцкага епіскапату, якому напярэдадні беларускія ўлады незаконна адмовілі ва ўездзе ў краіну.
«Беларускім уладам неабходна дазволіць вярнуцца арцыбіскупу Кандрусевічу, каб ён мог даглядаць за сваёй паствай у час пратэстаў, якія не спыняюцца», — піша высокі амерыканскі чыноўнік.
«Ён і ўвесь беларускі народ павінны без перашкод карыстацца сваімі асноўнымі свабодамі, уключна са свабодай веравызнання», — нагадаў Майк Пампеа пра правы, замацаваныя таксама ў Канстытуцыі Рэспублікі Беларусь.
Нагадаем, што 31 жніўня падчас вяртання на Радзіму са службовай замежнай паездкі Мітрапаліту Мінска-Магілёўскаму арцыбіскупу Тадэвушу Кандрусевічу, які нарадзіўся ў Беларусі, з’яўляецца грамадзянінам Рэспублікі Беларусь і не мае іншага грамадзянства, было адмоўлена ва ўездзе ў краіну. Пра гэта напісалі вядучыя інфармацыйныя агенцтвы свету, у тым ліку і амерыканскае агенцтва CNA, на якое спасылаецца ва ўрадавым акаўнце Твітара дзяржсакратар ЗША.
Belarusian authorities should allow the re-entry of Archbishop Kondrusiewicz, so he can tend to his flock during the ongoing protests. He and all Belarusian people must be allowed to exercise their fundamental freedoms, including freedom to worship. https://t.co/S5Gyiq7SdB
— Secretary Pompeo (@SecPompeo) September 1, 2020
