Увечары 15 мая з’явілася афіцыйнае Паведамленне Курыі Віцебскай дыяцэзіі адносна святароў з Шуміліна (Віцебскі дэканат): ксяндзоў Анджэя Юхневіча і Паўла Лемеха з законніцкай супольнасці Місіянераў Аблатаў Марыі Беззаганнай.
Паведамленне было апублікавана на сайце Catholicnews.by.
«Курыя Віцебскай дыяцэзіі паведамляе, што 8 мая 2024 г. праваахоўнымі органамі былі затрыманыя а. Анджэй Юхневіч ОМІ і а. Павел Лемех ОМІ, святары з парафіі Маці Божай Фацімскай у Шуміліне.
На дадзены момант вядома, што яны адбываюць адміністрацыйны арышт. Айцец Анджэй — 15 сутак, айцец Павел — 10 сутак.
Заахвочваем шаноўных вернікаў памятаць аб гэтых святарах у малітве, каб Дух Святы даў ім неабходныя сілы і ўзмацніў у гэтым выпрабаванні», — гаворыцца ў Паведамленні Курыі Віцебскай дыяцэзіі.
