Увечары ў нядзелю 2 жніўня клубы чорнага дыму ўзняліся над найстарэйшай святыняй у іспанскай Пласэнсіі — познераманскім касцёлам святога Марціна, пабудаваным у ХІІІ стагоддзі.
Як паведамляе польская рэдакцыя парталу Vatican News, мястэчка знаходзіцца ў 250-і км на паўднёвы захад ад Мадрыда. На месца здарэння адразу ж прыбылі мясцовы мэр Фэрнандо Пісара і біскуп Хасэ Луіс Рэтана.
Дзякуючы хуткім дзеянням пажарных удалося ўратаваць унікальны алтар XVI стагоддзя, аўтарам якога з’яўляецца вядомы мастак Луіс дэ Маралес, якога называлі El Divino — «Боскі». Тым не менш, алтар і святыня ў выніку пажару атрымалі значныя пашкоджанні.
«Не выключана, што гэта быў падпал», — кажа мэр Пласэнсіі Фэрнандо Пісара.
Сярод магчымых прычын пажару называецца таксама кароткае замыканне.
Вядома, што агонь загарэўся каля паўночных дзвярэй касцёла, якія ў апошнія гады не адчыняліся. Некаторыя мяркуюць, што гэта можа быць падпал на ўзор тых, якія адбываюцца ў Францыі. У Іспаніі таксама ёсць групы радыкалаў, якія сцвярджаюць, што «найлепшы касцёл — той, які свеціцца», гэта значыць гарыць.
«Мы маем шмат пытанняў адносна прычын пажару і яго наступстваў», — кажа Генеральны вікарый дыяцэзіі Пласэнсіі кс. Хасінто Нуньес.
«Калі б згарэў алтар, гэта была б незваротная страта. Аднак нас супакойвае факт, што яго можна аднавіць», — дадае мэр мястэчка.
