![](/3/images/news/2020/07/2020-07-30-ingress.jpg)
Урады павінны павялічыць старанні на карысць ідэнтыфікацыі ахвяраў эксплуатацыі і гандлю людзьмі, сцвярджае Caritas Internationalis у сувязі з Сусветным днём барацьбы з гандлем людзьмі, які адзначаецца 30 ліпеня.
Як паведамляе польская рэдакцыя парталу Vatican News, у свеце, па інфармацыі Міжнароднай арганізацыі працы, ужо больш за 40 мільёнаў такіх людзей.
У час пандэміі рызыка стаць ахвярай гандляроў людзьмі значна расце, асабліва сярод мігрантаў і нелегальных працаўнікоў, з якіх многія страцілі працу.
Адсутнасць свабоды перамяшчэння азначае, што ахвяры гандлю людзьмі маюць менш магчымасцяў уцячы і знайсці дапамогу.
Caritas Internationalis заклікае «стварыць сетку бяспекі, якая дапаможа прапанаваць усім з групы рызыкі матэрыяльную, медыцынскую, прававую і псіхалагічную падтрымку».
Дабрачынная арганізацыя заклікае да абароны дзяцей, якіх эксплуатуюць таксама з дапамогай інтэрнэту і новых медыя. Паводле Caritas, у перыяд пандэміі значна ўзрасла колькасць выпадкаў насілля ў адносінах да дзяцей і колькасць непаўнагадовых, якія сталі ахвярамі выкарыстання ў інтэрнэце.
У Індыі за 11 дзён уладам стала вядома пра 92 тысячы выпадкаў жорсткага абыходжання з дзецьмі, многія з якіх былі прымушаны жабраваць на вуліцы.
Асабліва сур’ёзная сітуацыя ў Ліване і іншых краінах Блізкага Усходу, дзе шмат філіпінцаў і іншых замежных працаўнікоў змагаецца за вяртанне дадому пасля страты працы з-за Covid-19 i эканамічнага крызісу. Яны, як адзначаецца, стаяць у чэргах перад сваімі пасольствамі без усялякай падтрымкі, многія з іх не маюць ніякага прававога статусу.
Рашэнне аб’явіць 30 ліпеня Сусветным днём барацьбы з гандлем людзьмі было прынята Генеральнай Асамблеяй ААН у 2013 г.