Крызіс, выкліканы каранавірусам, прывёў да таго, што ў многіх краінах Лацінскай Амерыкі пачала паглыбляцца праблема голаду.
«Цэны растуць. Людзі не маюць працы і ніякіх запасаў. Без знешняй дапамогі голад збярэ больш ахвяраў, чым смяротная пандэмія», — прыводзіць польская рэдакцыя парталу Vatican News словы Марыі Вітторыі Рава, якая ўзначальвае фонд, што на працягу многіх гадоў дапамагае ў гэтым рэгіёне асабліва сіротам і дзецям з інваліднасцю.
Лацінская Амерыка і Карыбы — рэгіён, дзе каранавірус распаўсюджваецца найбольш хутка. На сённяшні дзень гаворка ідзе ўжо пра больш чым чатыры мільёны заражаных.
Самая драматычная сітуацыя ў Бразіліі, Мексіцы і Перу.
«У дамах, дзе мы апякуемся дзецьмі ў Нікарагуа, пачынае не хапаць прадуктаў харчавання, а іх набыццё — гэта штосьці падобнае да цуду. Падобная сітуацыя ў Гандурасе. Ахоўныя сродкі практычна немагчыма набыць», — сказала суразмоўца Vatican News.
«У краінах Лацінскай Амерыкі, дзе мы дзейнічаем, шпіталі перажываюць велізарныя цяжкасці, не хапае не толькі лекаў, але і ахоўных сродкаў. Сітуацыя драматычная, бо вельмі цяжка здабыць нават ваду для мыцця рук, — адзначыла кіраўніца фонду. — Мы стараемся ахапіць дапамогай як дзяцей, так і іншых патрабуючых на тэрыторыі, дзе мы дзейнічаем». «Школы закрыліся, і гэта прывяло да таго, што дзеці страцілі не толькі магчымасць вучыцца, але найперш асноўную медыцынскую апеку і адзіны пасілак, які там атрымлівалі. Гэта значна паглыбіла цярпенні сем’яў і дзяцей», — дадала яна.
Прадстаўніца фонду звяртаецца да людзей добрай волі з заахвочваннем падтрымаць дабрачынную дзейнасць:
«Для многіх з нас гэта кошт штодзённай кавы, што ў Лацінскай Амерыцы перакладаецца на чыёсьці жыццё або смерць.
Створым гэты мост любові для церпячых дзяцей. Сёння яны вядуць сапраўды неверагодна цяжкае змаганне за жыццё».
