Новы сталы дыякан у Касцёле ў Латвіі быў пасвячаны ў Ліепайскай дыяцэзіі, на тэрыторыі гістарычнай Курляндыі. Да гэтага часу сталыя дыяканы служылі толькі ў Рыжскай архідыяцэзіі.
Як паведамляе агенцтва КАІ, недахоп святарскіх пакліканняў і сучасныя патрабаванні евангелізацыі і касцёльнага жыцця ўсё больш выразна ўказваюць на патрэбу актывізацыі свецкіх вернікаў. Сталы дыяканат — спроба адказаць на гэтыя выклікі.
Пасвячэнне адбылося ў нядзелю ў парафіяльным касцёле ў Салдусе, дзе новы дыякан Яніс Радзіньш актыўна ўдзельнічае ў касцёльным жыцці на працягу 20 гадоў.
Таксама ён вучыўся ў Рыжскім інстытуце рэлігійных навук, які з’яўляецца філіялам Папскага Латэранскага ўніверсітэта.
У апошнія гады Яніс Радзіньш быў у сваёй парафіі спачатку лектарам, а потым акалітам. Як падкрэсліў ардынарый Ліепайскай дыяцэзіі біскуп Віктарс Стулпінс, гэта быў як быццам пошук паклікання ў пакліканні, вянцом чаго стала менавіта дыяканскае пасвячэнне.
Рашэнне аб адраджэнні інстытуту сталага, або пастаяннага, дыяканату было прынята таксама беларускім епіскапатам, але кожны біскуп самастойна вырашае, ці патрэбныя ў яго дыяцэзіі сталыя дыяканы.
