23 мая ў вядомым санктуарыі на Яснай Гары ў Чэнстахове (Польшча), дзе нясуць служэнне айцы паўліны, прайшла ўрачыстасць прэзбітэрскага пасвячэння.
Як паведамляецца на сайце ордэна паўлінаў paulini.pl, новымі святарамі сталі 7 дыяканаў розных нацыянальнасцяў: 4-х палякаў, камерунец, славак і беларус. Новым айцом паўлінам родам з Беларусі стаў Уладзімір Лопух, які паходзіць з парафіі святой Ганны ў Варончы (Гродзенская дыяцэзія, Навагрудскі дэканат).
Святарскае пасвячэнне ўдзяліў арцыбіскуп Анджэй Пшыбыльскі, мітрапаліт Катавіцкі.
На ўрачыстасці прысутнічалі айцы і браты паўліны разам з нядаўна выбраным генеральным настаяцелем Ордэна Паўлінаў айцом Бэньямінам Бонкоўскім OSPPE, ксяндзы пробашчы, бацькі і родныя, сябры і знаёмыя нашых сабратоў.
У прамоўленай гаміліі арцыбіскуп Пшыбыльскі растлумачыў новапасвечаным святарам, што «дзеля любові да Бога, дзеля любові да сваіх братоў і сясцёр, як сябар Езуса, святар павінен стаць новым стварэннем» і ніколі не можа быць перашкодай для Божай любові. Тлумачачы, што значыць быць новым стварэннем, ён падкрэсліў, што гэта азначае быць інструментам Божай ласкі. Іерарх заклікаў іх вучыцца ў святога Паўла Першага Пустэльніка малітве і адносінам з Богам, бо без гэтага «немагчыма быць Яго добрым інструментам».
Пасля заканчэння Імшы генеральны настаяцель айцец Беніямін Бонкоўскі OSPPE падзякаваў арцыбіскупу за яго бацькоўскую малітву. Ён нагадаў новапасвечаным святарам, што яны пачынаюць прыгожы і незвычайны шлях удзялення сакрамэнтаў і святарскага служэння. Ён папярэдзіў іх, каб яны былі гатовыя да выпрабаванняў, з якімі сутыкнуцца ў сваім святарскім і рэлігійным служэнні, і загадаў ім памятаць пра абяцанні, якія яны далі ў гэты дзень.
Генеральны настаяцель ордэна таксама ўручыў айцам дэкрэты, якія накіроўваюць іх служыць у розныя часткі свету.
Айцец Уладзімір Лопух OSPPE атрымаў дэкрэт на служэнне ў польскім горадзе Свідніца.
