11 кастрычніка ў семінарыйна-парафіяльным касцёле Найсвяцейшай Панны Марыі Каралевы Апосталаў у Алтажэве (Польшча) адбылося пасвячэнне дыяканаў для Таварыства Каталіцкага Апостальства (айцы палатыны).
Сярод кандыдатаў сакрамэнт пасвячэння ў ступені дыяканату прыняў выпускнік Вышэйшай духоўнай семінарыі ксяндзоў палатынаў Павел Мікулка з парафіі Найсвяцейшай Тройцы ў Германішках.
Раней, 25 чэрвеня, у касцёле Сан-Сальваторэ-ін-Онда ў Рыме, ля магілы заснавальніка палатынаў — святога Вінцэнта Палоцці — гэты малады беларускі паллатын даў вечныя абяцанні жыцця ў чыстасці, убостве і паслухмянасці ў згаданым таварыстве.
Пасвячэнне дыяканату ўдзяліў біскуп Плоцкай дыяцэзіі (Польшча) Шымон Стулкоўскі.
На пачатку цэлебрацыі рэктар семінарыі прывітаў удзельнікаў урачыстасці. Асаблівае прывітанне ён скіраваў святарам і гасцям з Беларусі на беларускай мове — роднай мове дыякана Паўла.
У прамоўленай гаміліі біскуп Шымон заахвоціў кандыдатаў да дыяканату верна ісці за Хрыстом. Ён пажадаў ім плённага служэння ў якасці дыяканаў, а таксама добрай падрыхтоўкі да святарскага пасвячэння.
