19 кастрычніка ў семінарыйна-парафіяльным касцёле Найсвяцейшай Панны Марыі Каралевы Апосталаў у Алтажэве (Польшча) адбылося пасвячэнне дыяканаў для Таварыства Каталіцкага Апостальства (палатыны).
Сярод іншых кандыдатаў, сакрамэнт пасвячэння ў ступені дыяканату прыняў выпускнік Вышэйшай духоўнай семінарыі ксяндзоў палатынаў Віталій Міцкевіч з парафіі Найсвяцейшага Сэрца Езуса ў Пелішчы (Пінская дыяцэзія, Брэсцкі дэканат).
Раней, 8 верасня, у свята Нараджэння Найсвяцейшай Панны Марыі, гэты малады беларускі палатын даў вечныя абяцанні жыцця ў чыстасці, убостве і паслухмянасці ў згаданным таварыстве.
Пасвячэнне дыяканату ўдзяліў дапаможны біскуп Бельска-Жывецкай дыяцэзіі ў Польшчы Пётр Грэгер.
На пачатку цэлебрацыі рэктар семінарыі прывітаў удзельнікаў урачыстасці.
Асаблівае прывітанне ён скіраваў святарам і гасцям з Беларусі на беларускай мове, роднай мове дыякана Віталія.
У прамоўленай гаміліі біскуп Грэгер засяродзіўся на вобразе добрага Пастыра, заахвоціўшы кандыдатаў да дыяканату верна ісці за Хрыстом. Біскуп пажадаў ім плённага служэння ў якасці дыяканаў, а таксама добрай падрыхтоўкі да святарскага пасвячэння.
