У Велікодны час вернікі парафіі святога Андрэя апостала і святога Леапольда Багдана Мандзіча з Мінска разам з ксяндзамі палатынамі Аляксандрам Сушынскім SAC і Яўгенам Эйсмантам SAC падзяліліся радасцю Уваскрасення Хрыста і цеплынёй свайго сэрца з выхаванцамі Гомельскага дома-інтэрната для дзяцей-інвалідаў з асаблівасцямі псіхафізічнага развіцця.
Па ініцыятыве валанцёраў парафіяльнага Caritas на працягу Вялікага посту вернікі парафіі сабралі для 44-х дзяцей неабходныя рэчы: сродкі гігіены, бытавую хімію і вялікую колькасць ласункаў, якія ім на мінулым тыдні перадалі святары.
Выхаванцы і супрацоўнікі гомельскага дома-інтэрната былі радыя і ўдзячныя за клопат, дапамогу і падтрымку.
Нягледзячы на тое, што ў маладой сталічнай парафіі, размешчанай у мікрараёне Уручча, будуецца касцёл, і гэта патрабуе вялікіх сродкаў, вернікі не адмовілі ў дапамозе дзецям у патрэбе, кіруючыся словамі святога апостала Паўла: «Не спыняймася рабіць дабро, бо ў свой час і жаць будзем, калі не аслабнем. Дык вось, пакуль дадзены час, будземрабіць дабро ўсім» (Гал 6, 9–10a).
