22 мая для дыяканаў Гродзенскай дыяцэзіі, якія рыхтуюцца прыняць сакрамэнт пасвячэння ў ступені прэзбітэрату, — напярэдадні гэтай важнай падзеі — былі праведзеныя рэкалекцыі.
Правёў рэкалекцыі ксёндз Андрэй Лысы SChr. Іх мэтай было дапамагчы дыяканам у цішыні, малітве і разважаннях падрыхтавацца да адказнага служэння Богу і людзям.
«У цэнтры разважанняў былі элементы сакрамэнту пасвячэння і знакі, якія ў сваёй глыбіні маюць глыбокі духоўны сэнс адносна святарскага служэння»,
— кажуць удзельнікі.
Рэкалекцыі далі дыяканам магчымасць інтэнсіўнай малітвы і ўнутранага ўзрастання і дапамаглі глыбей усвядоміць веліч дару, які кандыдаты да святарства неўзабаве атрымаюць праз сакрамэнт пасвячэння.
Важным момантам у межах рэкалекцый стаў візіт біскупа Гродзенскага Уладзіміра Гуляя, мэтай якога было падтрымаць дыяканаў у гэты вырашальны перыяд.
Кульмінацыяй сустрэчы іерарха з удзельнікамі рэкалекцый стала супольная цэлебрацыя святой Імшы. У слове да будучых прэзбітэраў біскуп засяродзіў увагу на глыбокім значэнні святарскага паклікання і запэўніў іх у малітоўнай падтрымцы паствы.
