20 чэрвеня Папа на пенсіі Бэнэдыкт XVI наведаў пахаванні сваіх родных на могілках у Пентлінгу, што непадалёк ад Рэгенсбурга, а таксама дом, у якім жыў як «прафесар Ратцынгер» у 1970–1977 гадах.
Пра гэта са спасылкай на Рэгенсбуржскую дыяцэзію паведаміла Каталіцкае інфармацыйнае агенцтва КАІ.
Апошні раз Бэнэдыкт XVI наведваў гэтыя мясціны падчас свайго душпастырскага падарожжа ў Баварыю ў 2006 г.
Акрамя таго, Папа на пенсіі наведаў могілкі, на якіх пахаваныя яго бацькі і сястра. Бацька Бэнэдыкта XVI Ёзаф памёр у 1959 г., маці Марыя — у 1963 г., а яго старэйшая сястра, таксама Марыя, якая ніколі не была замужам і займалася гаспадаркай у яго доме, адышла ў вечнасць у 1991 г.
Раніцай у нядзелю 93-гадовы Пантыфік-пенсіянер цэлебраваў св. Імшу разам са сваім братам кс. Георгам Ратцынгерам.
Як зазначыў Апостальскі нунцый у Германіі арцыбіскуп Нікола Этэравіч, які сустрэўся з Бэнэдыктам XVI падчас яго прыватнага візіту на радзіму, што Папа на пенсіі добра адчувае сябе ў Рэгенсбургу. Ён шчыра падзякаваў мясцоваму біскупу і яго супрацоўнікам за праяўленую гасціннасць і клопат.
«Мы ўсе як члены Каталіцкага Касцёла злучаныя повязямі адзінства. Гэта вялікая сям’я на ўсім свеце», — падкрэсліў прадстаўнік Папы Францішка ў Германіі.
Паведамляецца, што 22 чэрвеня ў панядзелак Папа на пенсіі Бэнэдыкт XVI вернецца ў Рым дзе пасля сыходу з Пасаду святога Пятра пастаянна жыве ў кляштары на тэрыторыі Ватыкана.
