26 мая ў шпіталі ў горадзе Люблінец (Польшча) адышоў у вечнасць ксёндз Вацлаў Грыневіч з законніцкай супольнасці Місіянераў Аблатаў Беззаганнай Марыі (OMI) — вядомы тэолаг і экуменіст.
Як паведамляе сайт беларускай грэка-каталіцкай газеты «Царква», значнае месца ў яго тэалагічнай працы займала таямніца Хрыстовай Пасхі і багаслоўе старажытнай Русі.
Вацлаў Грыневіч нарадзіўся 23 ліпеня 1936 года на Падляшшы ў мястэчку Ламазы на гістарычнай Берасцейшчыне (сёння — Люблінскае ваяводства ў Польшчы). 8 верасня 1953 года даў першыя законніцкія абяцанні ў супольнасці Місіянераў Аблатаў Беззаганнай Марыі, а 26 чэрвеня 1960 года прыняў прэзбітэрскае пасвячэнне.
Ксёндз Вацлаў Грыневіч быў вядомым тэолагам і экуменістам, выдатным знаўцам багаслоўя Усходніх Цэркваў. Многія называлі яго «тэолагам надзеі і любові».
«Мы прызвычаіліся да падзелу ў хрысціянстве, і гэта, мабыць, адзін з найвялікшых нашых грахоў», — казаў ксёндз Вацлаў Грыневіч.
На працягу многіх гадоў святар быў звязаны з Люблінскім каталіцкім універсітэтам Яна Паўла II. Ён стаў сузаснавальнікам Экуменічнага інстытута Люблінскага каталіцкага ўніверсітэта і з’яўляўся яго шматгадовым дырэктарам да 2005 года.
Ксёндз Грыневіч быў дарадцам у Папскай радзе па справах хрысціянскага адзінства (1979–1984) і сябрам Міжнароднай змяшанай камісіі па тэалагічным дыялогу паміж Каталіцкім Касцёлам і Праваслаўнай Царквой (1980–2005).
Ксёндз Вацлаў Грыневіч — аўтар многіх навуковых артыкулаў і багаслоўскіх кніг. Значнае месца ў ягонай тэалагічнай працы займала таямніца Хрыстовай Пасхі і багаслоўе старажытнай Русі.
Рэдакцыя беларускай грэка-каталіцкай газеты «Царква» ў 1997 годзе прычынілася да выдання брашуры з важным артыкулам тэолага «Пасхальныя матывы ў творах св. Кірылы Тураўскага». Багаслоўскі роздум ксяндза Вацлава Грыневіча над творамі св. Кірылы Тураўскага заахвочвае сённяшніх спадкаемцаў славутага Тураўскага епіскапа шукаць у таямніцы Пасхі Хрыстовай крыніцу для духоўнага адраджэння сучаснага грамадства.
Тэалагічная трылогія ксяндза Грыневіча «Хрыстус — наша Пасха» служыла асновай для духоўнай фармацыі духавенства Беларускай Грэка-Каталіцкай Царквы. Яго багаслоўская дзейнасць натхніла таксама на міжканфесійныя сустрэчы моладзі ў прыбужскім Кодані і ўніяцкай парафіі ў Кастамлотах.
Развітальныя абрады і пахаванне ксяндза Вацлава Грыневіча ОМІ адбудуцца ў санктуарыі Маці Божай Коданьскай у Кодані ў суботу 30 мая.
Будзе весціся прамая трансляцыя анлайн. Пачатак а 11-й гадзіне па мінскім часе.
Вечны адпачынак дай яму, Пане…
