25 студзеня ў катэдральнай базыліцы святога Францішка Ксавэрыя ў Гродне адбылося экуменічнае набажэнства з удзелам прадстаўнікоў духавенства і вернікаў розных хрысціянскіх канфесій.
Набажэнства адбывалася ў свята Навяртання святога апостала Паўла, на заканчэнне Тыдня малітваў аб адзінстве хрысціянаў, які штогод праводзіцца з 18 па 25 студзеня.
Сёлета ён праходзіў пад дэвізам «Ці верыш у гэта?» (Ян 11, 26) і быў прысвечаны 1700-годдзю з часу Нікейскага Сабору, на якім зацвердзілі першы Сімвал хрысціянскай веры.
Як паведаміла Прэс-служба Гродзенскай дыяцэзіі, у экуменічным набажэнстве ў Гродне, якое ўзначаліў біскуп Гродзенскі Уладзімір Гуляй, удзельнічалі прадстаўнікі Рыма-Каталіцкага Касцёла, Апостальскай адміністратуры для грэка-католікаў у Беларусі, Беларускай Праваслаўнай Царквы, евангелічна-лютэранскай супольнасці, супольнасці «Царква поўнага Евангелля „Жывое Слова“».
Вітаючы прысутных, біскуп Гуляй нагадаў, што ідэя правядзення Тыдня малітваў аб адзінстве хрысціянаў нарадзілася з усведамлення таго, што падзелы паміж хрысціянамі «з’яўляюцца вялікім няшчасцем і спакусай, супярэчаць волі Хрыста, які хацеў, каб усе Яго вызнаўцы „былі адно“».
«Мы павінны рабіць усё, што ў нашых сілах, каб знайсці страчанае адзінства», — дадаў іерарх.
У ходзе малітоўнай сустрэчы прадстаўнікі канфесій па чарзе звярнуліся да ўдзельнікаў.
Перадусім было зачытана прывітальнае слова, з якім звярнуўся да ўдзельнікаў набажэнства праваслаўны епіскап Гродзенскі і Ваўкавыскі Антоній.
«Шчыра перакананы, што запаведзі аб любові да Бога і бліжніх павінны быць альфай і амегай пошукаў хрысціянскага адзінства ў ХХІ стагоддзі. <…> Пустым звонам будуць разважанні на тэму духоўнасці, пазбаўленыя любові. І наадварот: любоў, якая выяўляецца ў добрых справах, здольная стаць нашай агульнай мовай», — падкрэсліў праваслаўны іерарх.
Ён дадаў, што «не павінна быць месца спробам навязаць штучнае „адзінства“ як нейкі глабальны кампраміс»: «гісторыя паказвае, што такія палітычна-рэлігійныя праекты заўсёды цягнулі за сабой сумныя наступствы». Епіскап Антоній падкрэсліў, што праваслаўным і католікам важна «навучыцца ўспрымаць адзін аднаго ў якасці не канкурэнтаў, а саюзнікаў», і выказвае меркаванне, што «жыццё ў Гродзенскім рэгіёне з яго адмысловым культурным кодам дае шанц пацвердзіць праўду гэтых словаў».
Прадстаўнік Апостальскай адміністратуры для грэка-католікаў у Беларусі айцец Андрэй Крот у звароце да прысутных прызнаўся, што яго ўзрушвае традыцыя збірацца разам на экуменічным набажэнстве ў межах Тыдня малітваў аб адзінстве хрысціянаў. «Калі мы молімся так ужо каторы раз, то значыць, гэта справа Божая, якая сапраўды ляжыць у нас на сэрцы, якая нас хвалюе і якой мы гатовы прысвячаць свой час і малітву», — сказаў грэка-каталіцкі святар.
«Нас яднаюць не чалавечыя рашэнні, прынцыпы, правілы — нас яднае Збаўца», — дадаў айцец Андрэй і заахвоціў працягваць «шукаць тое, што яднае».
Прадстаўнік евангелічна-лютэранскай супольнасці пастар Уладзімір Татарнікаў заўважыў, што «ў Касцёл мы прыходзім не за ведамі, не за эмоцыямі, а за жыццём, за надзеяй». Ён дадаў, што зямныя надзеі не спраўджваюцца, але «Касцёл — месца, дзе жыццё і надзея прабываюць дзякуючы Слову, вестцы аб Божай любові».
Па словах пастара, канфесіі могуць адрознівацца ведамі, каштоўнасцямі, элементамі веравучэння, «але самае галоўнае, што нас аб’ядноўвае, — гэта жыццё, надзея, сакрамэнт хросту і Слова Бога: тое, што мы павінны зберагаць і над чым павінны разам, незалежна ад канфесійнай прыналежнасці, працаваць».
Пастар Уладзімір падкрэсліў: «Езус Хрыстус сярод нас быў, ёсць і будзе вечна».
Пастар Віктар Сцяпко з супольнасці «Царква поўнага Евангелля „Жывое Слова“» адзначыў: «Сёння Пан задае нам пытанне: „Хто Я для вас?“ І кожны з нас павінен на гэтае пытанне адказаць».
Пастар нагадаў словы Пана: «Я стварыў Касцёл, і брамы пекла яго не перамогуць», і дадаў, што, як відаць з гэтых словаў, «калі Касцёл будзе ўзносіцца, то будзе ў адным „экземпляры“».
З заключным словам выступіў біскуп Уладзімір Гуляй. Іерарх перадусім нагадаў, што свет быў створаны Богам як месца, «дзе чалавек павінен быў быць шчаслівым і рэалізоўваць сябе ва ўсёй паўнаце ў любові і гармоніі жыцця з Панам», але чалавек не захаваў вернасці Богу, таму свет страціў першапачатковую дасканаласць.
Біскуп звярнуў увагу на тое, як важна разумець, што «Езус — маё ўваскрасенне і жыццё», давярацца Яму і дазваляць «дзейнічаць паводле Яго, а не нашай мудрасці». Разважаючы над чытаннем Евангелля пра ўваскрашэнне Езусам Лазара, іерарх заўважыў: «Нярэдка нам здаецца, што Пан Езус рэагуе занадта позна ці няправільна на нашы пакуты або наогул не прыходзіць на дапамогу. <…> Мы найперш павінны ўсвядоміць, што Езус — праўдзівы Бог, а Божыя думкі — не нашы думкі.
Ён бачыць больш і далей, чым мы; бачыць, што нам патрэбна, хоча нам дапамагчы і дапамагае найлепшым чынам з усіх магчымых і найбольш адпаведным, хоць і не заўсёды менавіта так, як мы чакаем», — падкрэсліў біскуп Гуляй.
Пастыр Касцёла Гродзенскай дыяцэзіі заахвоціў удзельнікаў набажэнства паверыць у тое, што Езус хоча пастаянна выводзіць чалавека «з магілы малавер’я, пыхі, эгаізму, грахоў, залежнасцяў і слабасцяў», як вывеў з магілы Лазара, каб чалавек «перастаў засяроджвацца на сабе, зірнуў на Езуса, на Яго Крыж і ішоў за Ім да збаўлення дарогай любові».
Напрыканцы набажэнства біскуп Уладзімір Гуляй падзякаваў прысутным вернікам розных канфесій, якія разам са сваімі духоўнымі кіраўнікамі прыйшлі на гэтую малітоўную сустрэчу.
