20 мая ў Камбоджы адзначаецца агульнанацыянальны дзень памяці ахвяраў чырвоных кхмераў, які напачатку насіў назву «Дня нянавісці», а сёння афіцыйна называецца «Днём праведнага гневу».
У гэты дзень жыхары гэтай азіяцкай краіны ўзгадваюць ахвяраў палітычнага тэрору, арганізаванага ў 1975–1979 гадах таталітарным камуністычным рэжымам чырвоных кхмераў на чале з дыктатарам Пол Потам, чыё імя стала побач з найбольш крывавымі злачынцамі ХХ стагоддзя — Гітлерам і Сталіным.
Аднак камбаджыйскія католікі не жадаюць вяртацца да тых трагічных падзей з гневам і імкненнем адпомсціць, зазначыў біскуп Пнампеня Аліўе Шмітхойслер.
Як паведаміла інфармацыйнае агенцтва Fides, па словах іерарха, Касцёл не прымае такога падыходу.
Камбаджыйскія католікі перажываюць гэты дзень як дзень памяці, мучанікаў і прымірэння.
Разам з тым біскуп Шмітхойслер заўважыў, што абавязак хрысціянаў — памятаць пра злачынствы камуністычнага рэжыму. Да гэтага іх абавязвае таксама першы мясцовы біскуп Юзаф Чма Салас, які ў сваіх апошніх словах перад зняволеннем і мучаніцтвам папрасіў, каб свет даведаўся пра тое, што ён перажыў. Сёння яго імя адкрывае спіс з 14-і камбаджыйскіх мучанікаў, чый беатыфікацыйны працэс працягваецца з 2015 года.
Біскуп Аліўе Шмітхойслер таксама нагадаў, што сёлета прыпадае 30-я гадавіна адраджэння Каталіцкага Касцёла ў Камбоджы.
14 красавіка 1990 года біскуп Эміль Дэтомб цэлебраваў пасхальную літургію ў адным з кінатэатраў сталіцы краіны Пнампеня. Запалены тады пасхал стаў яскравым знакам святла веры, якое не ўдалося згасіць у душах людзей жорсткім пераследнікам, дадае іерарх, які належыць да місіянерскай кангрэгацыі «Парыжскае таварыства замежных місій».
