27 красавіка Патрыярх Маскоўскі і ўсяе Русі Кірыл выдаў распараджэнне, у якім папярэдзіў духавенства аб асабістай адказнасці за незахаванне дадзеных кампетэнтнай царкоўнай уладай указанняў, скіраваных на прадухіленне каранавіруснай інфекцыі.
У распараджэнні, апублікаваным на афіцыйным сайце Маскоўскага Патрыярхату Рatriarchia.ru, кіраўнік Рускай Праваслаўнай Царквы нагадаў настаяцелям манастыроў, прыходаў і падвор’яў гарадской часткі Маскоўскай епархіі, а таксама ўсім духоўным асобам пра іх асабістую адказнасць за захаванне ў даручаных іх апецы царкоўных структурах распараджэнняў і ўказанняў, скіраваных на абмежаванне распаўсюджвання каранавіруснай інфекцыі і прадухіленне масавай пагрозы жыццю людзей.
У дадатку да распараджэння Патрыярха прыкладзены спіс з сямі дакументаў, якія, пачынаючы з сярэдзіны сакавіка і да мінулага тыдня былі разасланыя кампетэнтымі царкоўнымі ўладамі духавенству Маскоўскай епархіі.
Сярод іх «Інструкцыя настаяцелям прыходаў і падвор’яў, ігуменам і ігуменням манастыроў Маскоўскай епархіі ў сувязі з пагрозай распаўсюджвання каранавіруснай інфекцыі», «Рэкамендацыі для святара, які прыбыў па выкліку на дом да пажылой асобы, не заражанай каранавіруснай інфекцыяй і не абавязанай захоўваць каранцін» з далучанымі ўказаннямі на выпадак паступлення просьбы ад асобы, якая знаходзіцца на каранціне, ці ад асобы, заражанай каранавіруснай інфекцыяй, якая знаходзіцца на хатнім лячэнні або ў шпіталі, цыркулярныя лісты адносна выканання ў царкоўных структурах прадпісанняў галоўнага санітарнага ўрача горада Масквы, «Памятка для вікарыятаў, прыходаў і падвор’яў горада Масквы ў сувязі з распаўсюджваннем каранавіруснай інфекцыі», а таксама нядаўні «План супрацьэпідэміічных мерапрыемстваў у манастыры супольнага жыцця пры выяўленні сярод насельнікаў хворага на ВРВІ і / ці каранавірусную інфекцыю».
«У тых выпадках, калі незахаванне гэтых распараджэнняў і ўказанняў пацягне за сабою заражэнне чалавека каранавіруснай інфекцыяй, а ў наступстве — смерць з прычыны гэтага заражэння, вінаваты можа быць прыцягнуты да царкоўнага суду, а ў іншых выпадках — да царкоўна-адміністрацыйнай адказнасці ў сувязі з наўмысным ігнараваннем мер, якія дазваляюць захаваць людзей ад масавага заражэння смяротнай хваробай», — адзначаецца ў распараджэнні Патрыярха Кірыла.
Варта нагадаць, што каталіцкія біскупы Беларусі таксама выдалі адпаведныя распараджэнні, мэта якіх — прадухіліць заражэнне каранавіруснай інфекцыяй. У сувязі з гэтым у Мінска-Магілёўскай архідыяцэзіі і Гродзенскай дыяцэзіі, дзе жыве найбольшая ў нашай краіне колькасць католікаў, былі перанесены на пазнейшы час урачыстасці Першай святой Камуніі і ўдзялення сакрамэнту канфірмацыі.
Гэтыя рашэнні біскупаў не могуць быць ігнараваныя ў паасобных парафіях духавенствам і вернікамі.
У сённяшняй складанай эпідэміялагічнай сітуацыі нармальнае правядзенне згаданых урачыстасцяў становіцца фактычна немагчымым, у сувязі з чым пробашчам, якія нясуць асабістую адказнасць за выкананне распараджэнняў сваіх пастыраў, даручана адкласці іх на пазнейшы час.
