Арцыбіскуп Парыжскі з рэзкай крытыкай паставіўся да дзеянняў паліцыі, якая захацела спыніць нядзельную Імшу ў адным са сталічных касцёлаў.
Пра гэта паведамляе польская рэдакцыя парталу Vatican News.
«Мы жывем у эпоху, якая нагадвае сумныя перыяды ў гісторыі Францыі, такія, як акупацыя», — сказаў арцыбіскуп Парыжскі Мішэль Апці. Ён дадаў, што ў адпаведнасці з законам узброеныя паліцэйскія могуць увайсці ў касцёл толькі са згоды пробашча або калі пад пагрозай знаходзіцца грамадскі парадак. На думку іерарха, гэты закон быў парушаны.
Здарэнне мела месца ў касцёле святога Андрэя. Пробашч ксёндз Філіп дэ Мэтр цэлебраваў Імшу для парафіі з трансляцыяй.
Згодна з абмежаваннямі, якія цяпер дзейнічаюць у краіне, у Эўхарыстыі маглі ўдзельнічаць толькі тыя, чыя прысутнасць неабходная для яе цэлебрацыі і трансляцыі.
У адпаведнасці з гэтым, акрамя святара ў касцёле былі арганіст, кантар, міністрант і трое вернікаў, якія чыталі Божае слова і малітву вернікаў.
Імша адбывалася пры зачыненых дзвярах, але, як адзначыў арцыбіскуп Апці, нейкі «зычлівы» сусед паведаміў паліцыі, што ў касцёле Імша цэлебруецца патаемна. Паліцэйскія ўварваліся ў святыню і загадалі спыніць літургію. Міністрант, які па збегу абставінаў таксама быў паліцэйскім, узяў на сябе пасрэдніцтва. У выніку Імша была ўзноўлена, але лектары мусілі пакінуць касцёл.
«Трэба захаваць здаровы сэнс і скончыць з гэтым цыркам», — сказаў арцыбіскуп Мішэль Апці, каментуючы скандальныя паводзіны паліцэйскіх.
Разам з тым ён перасцярог, што, калі гэта не зменіцца, трэба будзе пратэставаць больш рашучым чынам.
