Кляштар святой Кацярыны на гары Сінай, у якім зберагаецца адна з найкаштоўнейшых калекцый ікон у свеце, зрабіў даступным прагляд святых выяваў у сеціве.
Як паведамляе Каталіцкае інфармацыйнае агенцтва КАІ, унікальны электронны архіў быў створаны ў межах праекту «Іконы Сіная» (Icons of Sinai), рэалізаванага кафедрай мастацтва і археалогіі Прынстанскага ўніверсітэта (ЗША). Многія з прадстаўленых у ім ікон былі створаныя яшчэ да іканаборчай плыні ў Візантыі ў VIII–IX ст., якая змагалася з культам абразоў і сакральных выяваў. Іканаборцы знішчылі шмат старых абразоў. На Сінаі яны захаваліся, паколькі ў той час рэгіён ужо знаходзіўся пад уладаю мусульманаў.
У кляштары святой Кацярыны захоўваецца больш за палову ацалелых да нашага часу візантыйскіх абразоў.
Іх добраму захаванню паспрыяў шэраг фактараў: сухі стабільны клімат, непарыўная дзейнасць кляштару і старанная руплівасць манахаў. Маштабныя рэстаўрацыйна-кансервацыйныя працы ў кляштары былі распачаты манахамі ў сярэдзіне мінулага стагоддзя. Фота абразоў былі зробленыя навукоўцамі з Прынстанскага, Мічыганскага і Александрыйскага ўніверсітэтаў.
На прысвечанай праекту інтэрнэт-старонцы сёння можна ўбачыць 1294 унікальныя іконы.
