У Хрысціянскі сацыяльны цэнтр Місіі Добрага Самараніна ў Мінску быў перарададзены нядаўна адшуканы старадаўні абраз Маці Божай, на якім ёсць надпіс, што ён «святы і цудадзейны».
20 жніўня на сайце Місіі Samaranin.by было паведамлена, што ікону адшукалі двое рупліўцаў, шчырыя вернікі Павел Каралёў і Юрый Кудзелін. Яны ўклалі ўласныя сродкі і змясцілі абраз з выяваю Маці Божай з Дзіцяткам Езусам на руках у месца, дзе гучыць супольная хрысціянская малітва.
Малюнак зроблены алеем на палатне. На пачатку ХХ стагоддзя жывапіс часткова закрылі лінолеумам і, на жаль, пры мацаванні гэтага неадпаведнага матэрыялу абраз быў пашкоджаны цвікамі.
Калі ж лінолеум быў зняты, на палатне адкрылася мноства дэталяў, маляваных кветак і надпіс на лаціне Diva Virgo, што азначае «Боская Панна».
На абразе ёсць металічныя кароны, зоркі і шаты з надпісам, што ў 1775 годзе муж і жонка Сіневічы Сымон і Брыгіда з Дарэўскіх-Вярыгаў ахвяравалі гэтую шату. Такім чынам ёсць падставы меркаваць, што, калі шаты былі зробленыя ў XVIII стагоддзі, сам абраз быў створаны яшчэ раней.
Пры яго вывучэнні спецыялісты прыйшлі да высновы, што абліччы Марыі і Езуса на іконе былі адноўлены на пачатку ХХ стагоддзя. Калі была зроблена рэнтгенаграма абраза, быў выяўлены ранейшы выгляд твараў Маці Божай і Дзіцяткі Езуса.
У бліжэйшы час плануецца правесці рэстаўрацыю абраза, каб вярнуць яму першапачатковы выгляд і захаваць гэты твор сакоральнага мастацтва для наступных пакаленняў.
Цяпер на палатне ёсць страты, скразныя прарывы, пашкоджанне маляўнічага пласта, асабліва ў месцах злучэння дошак. Таксама неабходна правесці рэстаўрацыйныя працы з шатамі і, акрамя таго, з вялікай разной драўлянай рамай. Памер іконы разам з рамай складае 129 х 106 см.
На сайце Місіі Добрага Самараніна змешчана просьба аб дапамозе ў правядзенні рэстаўрацыі і кансервацыі абраза, якую могуць аказаць усе ахвотныя.
З гэтай мэтай падаюцца рэквізіты для добраахвотных ахвяраванняў на рэстаўрацыю іконы.
У Місіі таксама просяць падаваць імёны ахвярадаўцаў, за якіх абяцаюць маліцца.
