30 кастрычніка, напярэдадні ўрачыстасці Усіх Святых, падчас агульнай аўдыенцыі на плошчы святога Пятра ў Рыме Апостальскі адміністратар для грэка-католікаў у Беларусі архімандрыт Сяргей Гаек падараваў Папу Францішку малую ікону святой Еўфрасінні Полацкай.
Пра гэта паведамляецца на сайце грэка-каталіцкай парафіі святога праведнага Язэпа ў Мінску Svjazep.org.
Перададзеная кіраўніком Беларускай Грэка-Каталіцкай Царквы Святому Айцу ікона — сімвалічны дар экуменічнай групы моладзі з Віцебска, Гродна, Мінска і Полацка, якая ў межах Года малітвы, якім Папа Францішак абвясціў 2024 год, моліцца за хрысціянскія Цэрквы ў Беларусі.
Святая Еўфрасіння Полацкая нарадзілася каля 1104 года, паходзіла з роду полацкага князя Усяслава. Яе хроснае імя было Прадслава. Сваё жыццё цалкам прысвяціла Богу ў манастве, адрокшыся ад свецкага поспеху.
Для хрысціянаў Беларусі яна з’яўляецца «настаўніцай мудрасці і прыкладам малітвы». Ушаноўваюць яе хрысціяне візантыйскай традыцыі (праваслаўныя і грэка-католікі) у дзень яе спачыну 23 мая. Ушаноўваюць беларускую святую і рыма-католікі.
