Катэдра Мілана будзе зачынена для наведванняў прынамсі да 25 лютага ў сувязі з распаўсюджваннем каранавірусу. Пра гэта паведаміла ў нядзелю газета Il Messaggero.
«У адпаведнасці з прынятым на ўзроўні кіраўніцтва вобласці і міністэрства аховы здароўя рэгламентам, катэдра будзе зачынена да 25 лютага да далейшых распараджэнняў», — кажа газета, удакладняючы, што тэрмін можа быць падоўжаны.
Патрыярхат Венецыі, які раней абвясціў пра адмену ўсіх публічных касцёльных літургічных службаў, пацвердзіў, што доступ у касцёлы ў гістарычнай частцы горада на лагуне будзе моцна абмежаваны, каб «не дапускаць вялікай колькасці людзей».
«У прыватнасці, будзе закрыты доступ у базыліку святога Марка», — прыводзіць агенцтва ANSA заяву Патрыярхату.
Як адзначаецца, публічныя Імшы не будуць цэлебравацца нават падчас пахавання. «Могуць прысутнічаць толькі блізкія сваякі, але ніякіх шматлюдных службаў або літургій», — гаворыцца ў заяве.
Раней Патрыярхат Венецыі абвясціў пра адмену ўсіх Імшаў, у тым ліку ў сёлетнюю Папяльцовую сераду, якая распачынае ў Каталіцкім Касцёле перыяд Вялікага посту.
Як удакладняецца, гэтае рашэнне, якое датычыцца нядзельных набажэнстваў, прынята ў сувязі з распаўсюджваннем каранавірусу і распараджэннем уладаў вобласці Вэнэто прыпыніць любую грамадскую дзейнасць. Пры гэтым прадстаўнікі Касцёла заахвочваюць вернікаў не забывацца пра малітву, дапамогай у чым з’яўляюцца Імшы, якія транслююцца па радыё і тэлебачанні.
Паводле апошніх дадзеных, колькасць інфіцыраваных у Італіі перавысіла 150 чалавек.
Каранцін, які ўключае закрыццё школ, грамадскіх месцаў, у тым ліку тэатраў і музеяў, адмену любых мерапрыемстваў, сярод якіх культурныя і спартовыя, уведзены ў чатырох вобласцях Італіі: Ламбардыі, дзе найбольшая колькасць інфіцыраваных, Вэнэто, Эміліі-Раманьі, а таксама ў Фрыулі-Венецыі-Джуліі, дзе пакуль не вядома пра тых, хто захварэў. Тры чалавекі памерлі ад ускладненняў, выкліканых каранавірусам.
Такім чынам, Італія выйшла на трэцяе месца па колькасці інфіцыраваных у свеце пасля Кітая (77 тыс.) і Паўднёвай Карэі (602).
