Пошук


06.02.2019 15:11   Паводле: Vatican News
Фота tellerreport.com

Падчас агульнай аўдыенцыі, якая 6 лютага прайшла ў ватыканскай Зале Паўла VI, Святы Айцец падзяліўся з вернікамі сваімі думкамі пра пілігрымку ў Аб’яднаныя Арабскія Эміраты, якую здзейсніў 3–5 лютага.

Як паведамляе беларуская рэдакцыя партала Vatican News, Пётр нашага часу лічыць, што падарожжа ў гэтую мусульманскую краіну стала новай старонкай у гісторыі дыялогу паміж хрысціянствам і ісламам, а таксама ў будаванні міру ў свеце на фундаменце чалавечага братэрства.

«Папа ўпершыню накіраваўся на Аравійскі паўвостраў. Божы Провід пажадаў, каб праз 800 гадоў пасля візіту св. Францішка Асізскага да султана Маліка Аль-Каміля гэта быў Папа з імем Францішак.

Я часта думаў пра св. Францішка падчас падарожжа: гэта мне дапамагала трымаць у сэрцы Евангелле, любоў Езуса Хрыста ў розныя моманты гэтага візіту», — прызнаўся Святы Айцец.

«У маім сэрцы было Евангелле Хрыста, малітва да Айца за ўсіх Яго дзяцей, асабліва за самых бедных, за ахвяр несправядлівасці, войнаў, нястачы…; была малітва, каб дыялог паміж хрысціянствам і ісламам стаў вызначальным фактарам для міру ў сучасным свеце», — дадаў ён.

Пантыфік падзякаваў дзяржаўным і касцёльным уладам Аб’яднаных Арабскіх Эміратаў, мясцоваму духавенству, законнікам і свецкім вернікам за гасціннасць і добрую арганізацыю візіту. Краіна зрабіла вялікі прагрэс на працягу апошніх дзесяцігоддзяў і стала «скрыжаваннем паміж Усходам і Захадам, шматэтнічным і шматрэлігійным „аазісам“ і таму — адпаведным месцам для спрыяння культуры сустрэчы», падкрэсліў пастыр паўсюднага Касцёла.

Папа Францішак распавёў, што меў магчымасць сустрэцца з першым святаром, які прыбыў у Аб’яднаныя Арабскія Эміраты і заснаваў тут вялікую колькасць каталіцкіх супольнасцяў, а таксама са шматлікімі іншымі пастырамі розных абрадаў з Лівана, Індыі, Філіпінаў і іншых краін.

«Акрамя перамоваў у Абу-Дабі быў зроблены яшчэ адзін крок: Вялікі імам Аль-Азхар і я падпісалі Дакумент аб братэрстве паміж людзьмі, у якім разам сцвердзілі агульнае пакліканне ўсіх людзей быць братамі, бо яны з’яўляюцца Божымі дзецьмі; асудзілі ўсе формы насілля, асабліва пад покрывам рэлігійных матываў, а таксама абавязаліся пашыраць у свеце сапраўдныя каштоўнасці і мір»,

— зазначыў Папа.

Святы Айцец выказаў пажаданне, каб гэты дакумент вывучаўся ў навучальных установах, а таксама заклікаў вернікаў пазнаёміцца з ім, каб даць імпульс развіццю дыялогу аб братэрстве паміж людзьмі.

«У такую эпоху, як наша, калі існуе моцная спакуса назіраць сутыкненне паміж хрысціянскай і ісламскай цывілізацыямі, а таксама лічыць рэлігіі крыніцай канфліктаў, мы пажадалі даць чарговы знак — ясны і рашучы, — што, наадварот, сустракацца магчыма, што магчыма паважаць адно аднаго і весці дыялог, і што, нягледзячы на адметнасці паміж культурамі і традыцыямі, хрысціянскі і ісламскі свет цэняць і абараняюць агульныя каштоўнасці: жыццё, сям’ю, рэлігійныя пачуцці, пашану да пажылых людзей, выхаванне моладзі і іншыя», — сказаў Пантыфік.

Папа Францішак адзначыў, што ў Эміратах пражывае каля мільёна хрысціянаў, пераважна працаўнікоў азіяцкага паходжання. Ён распавёў, што сустракаўся з мясцовымі католікамі ў катэдральным касцёле ў Абу-Дабі, а таксама цэлебраваў св. Імшу, «абвяшчаючы Евангелле благаслаўленняў» і молячыся «аб міры і справядлівасці з асаблівай увагай да Блізкага Усходу і Емена».

«Дарагія браты і сёстры, гэтае падарожжа адносіцца да „сюрпрызаў“ Бога. Таму праславім Яго і Ягоны Провід, а таксама памолімся, каб зерне, якое было кінута, прынесла плён згодна з Яго святой воляй», — сказаў на заканчэнне сваёй катэхезы Святы Айцец.

Абноўлена 06.02.2019 15:30
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.