3 снежня у Дубаі (ААЭ) у гандлёва-выставачным цэнтры Expo City адкрыўся Павільён веры — ініцыятыва, накіраваная на павышэнне ўзроўня ўдзелу рэлігійных арганізацый у Канферэнцыі ААН па змене клімату (Сop 28).
Пра гэта паведамляе Беларуская служба парталу Vatican News.
«Няхай Усявышні благаславіць нашы сэрцы, каб разам мы маглі быць будаўнікамі міру і абаронцамі стварэння», — заклікаў Папа Францішак у пасланні з нагоды адкрыцця Павільёна веры.
У тэксце, прачытаным кардыналам П’етра Паралінам, Дзяржсакратаром Яго Святасці, Пантыфік падкрэсліў, што рэлігіі, з’яўляючыся сумленнем чалавецтва, нагадваюць нам пра тое, што мы смяротныя істоты з патрэбай у бясконцым.
«Мы смяротныя, мы абмежаваныя, і абараняць жыццё азначае таксама супрацьстаяць маніі пражэрлівай усемагутнасці, якая спусташае планету»,
— заўважыў Святы Айцец.
Папа Францішак папярэдзіў, што чалавек не павінен лічыць сябе гаспадаром свету, жыць так, як быццам Бога не існуе, дазваляць сабе захапляцца мінучымі рэчамі і замест таго, каб мець у сваім распараджэнні тэхналогію, дазваляць ёй панаваць над сабой, «зрабіць сябе таварам» і стаць абыякавым.
Пантыфік падкрэсліў, што кліматычная драма з’яўляецца таксама драмай рэлігійнай, «паколькі яе карані ляжаць у гордасці самадастатковасці стварэння», а «стварэнне без Створцы гіне».
Святы Айцец заклікаў, каб Павільён веры стаў месцам сустрэчы, а рэлігіі заўсёды былі «гасцінным месцам», дзе гучыць прарочае сведчанне аб неабходнасці трансцэндэнтнасці, братэрства, павагі і клопату адно аб адным, дзе не апраўдваецца прыгнёт стварэння.
Гаворачы аб «дзеянні», Папа Францішак звярнуў увагу на вострую неабходнасць у ініцыятывах на карысць навакольнага асяроддзя, і ў гэтым выпадку не дастаткова толькі эканамічных сродкаў, неабходна выхоўваць да «стрыманага і братэрскага ладу жыцця». Ён нагадаў, што «рэлігіі таксама пакліканы выхоўваць у кантэмпляцыі, таму што стварэнне з’яўляецца не толькі сістэмай, якую трэба абараняць, але і дарам, які трэба прыняць».
У пасланні Пантыфіка гаворыцца і пра неабходнасць малітвы і спачування, бо інакш свет будзе жыць толькі ў матэрыялізме, які складаецца з грошай і зброі.
Святы Айцец указаў на ўзаемазалежнасць міру і аховы стварэння.
«Мы ўсе бачым, як войны і канфлікты разбураюць навакольнае асяроддзе і падзяляюць народы, што ўскладняе ўдзел у агульных справах, такіх як абарона планеты», — падкрэсліў Папа Францішак.
Папа нагадаў аб тым, што ахова міру — гэта таксама задача рэлігіі.
«Калі ласка, няхай у гэтым не будзе ніякай непаслядоўнасці. Няхай дзеянні не адмаўляюць таго, што прамаўляецца вуснамі: не трэба абмяжоўвацца толькі размовамі аб міры, і няхай будзе занята выразная пазіцыя ў адносінах да тых, хто, называючы сябе вернікам, распальвае нянавісць і не супрацьстаіць насіллю», — дадаў Пантыфік.
«Браты, сёстры, няхай Усявышні благаславіць нашы сэрцы, каб мы разам былі будаўнікамі міру і абаронцамі стварэння», — такі заклік прагучаў у канцы папскага паслання.
