Пошук


13.12.2018 16:26   Catholic.by
© FarodiRoma

Як паведаміў 13 снежня кіраўнік прэс-службы Святога Пасаду Грэг Бёрк, у маі 2019 г. папа Францішак наведае з апостальскім візітам Балгарыю і Македонію.

У афіцыйным паведамленні гаворыцца, што Святы Айцец у адказ на запрашэнне дзяржаўных уладаў згаданых краін і іерархаў мясцовых Касцёлаў здзейсніць Апостальскае падарожжа на Балканы.

5–7 мая Пантыфік наведае гарады Сафію і Ракаўскі ў Балгарыі, а 7 мая скіруецца ў горад Скоп’е ў Былой Югаслаўскай Рэспубліцы Македонія.

Праграма візіту будзе апублікавана ў адпаведны час.

Як паведамляе партал Vatican News, лагатып візіту папы Францішка ў Балгарыю ўяўляе сабою дзве рукі, што падтрымліваюць зямны шар, спавіты стужкай у колерах балгарскага сцяга, на якім пазначаны Балканскі рэгіён. Вакол яго па коле змешчаны надпіс па-балгарску і на лаціне «Мір на зямлі»: менавіта так гучыць дэвіз папскага візіту ў гэтую краіну. Словы дэвізу гучаць як заклік да міру і нагадваюць энцыкліку Pacem in terris св. папы Яна ХХІІІ — першага візітатара і Апостальскага дэлегата ў Балгарыі.

Лагатып візіту ў Македонію ўяўляе сабой геаграфічны абрыс краіны, выкананы ў колерах нацыянальнага сцяга, на фоне якога змешчана фігура папы Францішка, які благаслаўляе. Над ім — дэвіз візіту, узяты з Евангелля паводле Лукі: «Не бойся, малы статак» (пар. Лк 12, 32). Паколькі горад Скоп’е, які наведае Святы Айцец у гэтай краіне, з’яўляецца родным горадам Маці Тэрэзы, у ніжняй частцы лагатыпу змешчаны блакітны хвалісты элемент габіту-сары гэтай святой місіянеркі Любові.

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.