Святы Оскар Рамэра стаў дасканалым уцелаўленнем вобразу Добрага Пастыра, які аддае сваё жыццё за авечак, падкрэсліў папа Францішак падчас сустрэчы з пілігрымамі з Сальвадора.
Аўдыенцыя прайшла 15 кастрычніка ў ватыканскай зале Паўла VI. Вялікая сальвадорская дэлегацыя прымала ўдзел у кананізацыі свайго знакамітага суайчынніка, якую Папа правёў днём раней.
Пантыфік адзначыў, што арцыбіскуп Рамэра быў пастырам, які бачыў бясконцую міласэрнасць Бога і бясконцую мізэрнасць чалавека. Па яго прыкладзе, падкрэсліў Папа, трэба «выходзіць насустрач бязмежнаму жаданню Бога прабачаць тым, хто каецца», і «адкрываць сэрцы братоў і сясцёр на ласкавасць Божай любові, у тым ліку праз прароцкае асуджэнне зла, што існуе ў свеце».
Паводле слоў Святога Айца, пасланне арцыбіскупа Рамэра адрасавана ўсім без выключэння. Яно кажа, што «кожны католік павінен быць мучанікам», бо мучанік азначае сведка Божага паслання перад людзьмі.
«Бог прагне прысутнічаць у нашым жыцці і заклікае нас абвяшчаць Яго пасланне свабоды ўсяму чалавецтву. Толькі ў Ім мы можам быць свабоднымі: свабоднымі ад граху, ад зла, ад нянавісці ў нашых сэрцах, свабоднымі ў любові і прыняцці Пана і нашах братоў і сясцёр», — заўважыў Пантыфік.
Ён дадаў, што для выканання гэтага нялёгкага задання абавязкова трэба чэрпаць падтрымку з малітвы.
«Мы павінны быць паяднанымі з Богам і знаходзіцца ў еднасці з Касцёлам. Святы Оскар кажа нам, што без Бога і без таямніцы Касцёла гэта немагчыма. Пры адной нагодзе ён казаў пра канфірмацыю як пра “сакрамэнт мучанікаў”»,
— нагадаў Папа.
Святы Айцец прывітаў увесь народ Сальвадора, які захаваў «жывую веру», нягледзячы на пакуты, выкліканыя падзеламі і вайной. «Памяць пра св. Оскара Рамэра — гэта выдатная нагода, каб скіраваць пасланне супакою і прымірэння да ўсіх народаў Лацінскай Амерыкі», — сказаў ён на заканчэнне свайго звароту.
Арцыбіскуп Сан-Сальвадора Оскар Арнульфа Рамэра-і-Гальдамес вядомы як мужны пастыр і абаронца бедных. Ён быў беатыфікаваны ў маі 2015 г. у горадзе Сан-Сальвадор, дзе выконваў сваё пастырскае служэнне і дзе быў забіты з нянавісці да веры падчас святой Імшы, якую цэлебраваў у мясцовым шпіталі.
