Пошук

21.11.2026 07:42   https://grodnensis.by / Catholic.by
Фота: https://grodnensis.by

22 лістапада Каталіцкі Касцёл успамінае святую Цэцылію, апякунку касцёльнай музыкі. З нагоды гэтага ўспаміну, які сёлета супадае з урачыстасцю Езуса Хрыста, Валадара Сусвету, біскуп Гродзенскі Уладзімір Гуляй накіраваў вернікам сваё слова, у якім выказаў удзячнасць арганістам, дырыжорам, спевакам і кіраўнікам хораў і заклікаў узносіць сэрцы да Хрыста.

Слова біскупа Гродзенскага
Уладзіміра Гуляя
на успамін святой Цэцыліі

Умілаваныя ў Хрысце Пану браты і сёстры,
арганісты, дырыжоры, спевакі і кіраўнікі дарослых,
дзіцячых і моладзевых хораў!

У дзень успаміну святой Цэцыліі, апякункі касцёльнай музыкі, хачу звярнуцца да вас са словамі шчырай удзячнасці і пашаны. Сёння разам з вамі мы дзякуем Богу за дар музыкі — мовы, якая дакранаецца да сэрца і дапамагае чалавеку ўзносіць душу да Бога.

Сёлета ўспамін святой Цэцыліі супадае з урачыстасцю Езуса Хрыста, Валадара Сусвету. Гэтае спалучэнне ўказвае на самую глыбокую мэту вашага служэння: дапамагаць людзям звяртаць сэрцы да Хрыста.

Бо касцёльны спеў — гэта не толькі прыгажосць, якая напаўняе святыню. Гэта малітва, якая аб’ядноўвае супольнасць; гэта голас веры, які ўзносіцца да Пана; гэта хвала, якую Касцёл складае свайму Валадару.

Хрыстус валадарыць не з трона зямной улады, але з крыжа — праз любоў, ахвяру і служэнне. Таму і ваша служэнне асаблівае: праз ноты і галасы, праз працу і рэпетыцыі, праз арганную музыку і супольны спеў вы дапамагаеце праслаўляць Таго, хто з’яўляецца Валадаром нашых сэрцаў і надзеяй свету.

Дарагія арганісты, дзякую вам за музыку, якая вядзе малітву і падтрымлівае спеў вернікаў. Дарагія дырыжоры і кіраўнікі хораў, дзякую за ваш час, цярплівасць і ўменне сабраць розныя галасы ў адно цэлае. Дарагія спевакі, дзякую за кожную рэпетыцыю, кожны спеў і кожны момант, калі вы сваім талентам дапамагаеце парафіяльнай супольнасці ўзносіць хвалу Богу.

Асобна дзякую тым, хто працуе з дзецьмі і моладдзю. Вы не толькі адкрываеце ім свет музыкі, але і дапамагаеце ім адчуць, што іхні голас патрэбны Касцёлу. У дзіцячых і моладзевых хорах не толькі нараджаецца гармонія спеваў — у іх узрастаюць вера, сяброўства і любоў да супольнасці.

Няхай прыклад святой Цэцыліі натхняе вас служыць з радасцю і адданасцю. Няхай Хрыстус, Валадар Сусвету, застаецца цэнтрам кожнага вашага спеву і крыніцай усялякай гармоніі. А ваш талент няхай і надалей будзе дарам для Бога і благаслаўленнем для людзей.

Ад усяго сэрца дзякую вам за служэнне супольнасці Касцёла. Няхай Пан адорвае вас моцай, натхненнем і радасцю, а святая Цэцылія апякуецца вамі і вашымі хорамі.

З любоўю і пастырскім благаслаўленнем,
біскуп Гродзенскі Уладзімір Гуляй

Гродна, 20.11.2026

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Дух хоча жыць у нас –
мы пакліканы да вечнага жыцця