5 ліпеня прэс-служба Святога Пасаду абнародавала афіцыйную праграму Апостальскага падарожжа папы Францішка ў краіны Балтыі.
Візіт Святога Айца ў Літву, Латвію і Эстонію запланаваны на 22–25 верасня 2018 г.
22–23 верасня — Літва
22 верасня самалёт італьянскай авіякампаніі Alitalia каля 11.30 даставіць Святога Айца ў Вільню. Пасля ўрачыстай цырымоніі прывітання Папа кіруеццца ў Прэзідэнцкі палац, дзе сустрэнецца з кіраўніком літоўскай дзяржавы, прадстаўнікамі органаў улады, грамадзянскай супольнасці і дыпламатычнага корпусу.
У другой палове дня папа Францішак наведае віленскі санктуарый Маці Божай Вастрабрамскай, дзе памоліцца перад цудатворным абразом Маці Міласэрнасці, пасля чаго сустрэнецца з моладдзю на плошчы перад віленскай катэдрай, дзе захоўваюцца рэліквіі св. Казіміра — апекуна моладзі.
Раніцай 23 верасня Папа скіруецца ў Каўнас, дзе ў мясцовым парку Santakos узначаліць нядзельную св. Імшу, якая завяршыцца супольнай малітвай «Анёл Панскі».
На другую палову дня запланавана сустрэча Пантыфіка з духавенствам, кансэкраванымі асобамі і семінарыстамі ў катэдральным касцёле Каўнаса.
Пасля сустрэчы Святы Айцец вернецца ў Вільню, дзе завяршыць афіцыйную праграму літоўскага этапу падарожжа наведваннем Музея акупацыі і барацьбы за свабоду і кароткай малітвай за ўсіх ахвяраў вайны.
Плануецца, што ў сустрэчах са Святым Айцом у Літве возьмуць удзел таксама вернікі з Беларусі.
24 верасня — Латвія
24 верасня Святы Айцец вылеціць у Латвію. Каля паловы дзявятай раніцы самалёт з Пантыфікам прызямліцца ў міжнародным аэрапорце Рыгі.
Пасля цырымоніі прывітання папа Францішак скіруецца ў Прэзідэнцкі палац для сустрэчы з латвійскім лідарам і іншымі прадстаўнікамі палітычнай улады, з членамі грамадзянскай супольнасці і дыпкорпусу.
Затым запланавана цырымонія ўскладання вянкоў да Помніка Свабоды — манумента ў памяць аб загінулых змагарах за незалежнасць Латвіі.
Далейшая праграма прадугледжвае экуменічную сустрэчу папы Францішка ў рыжскім Домскім катэдральным саборы, а пасля яе — візіт Святога Айца ў каталіцкі катэдральны касцёл св. Якуба.
Пасля абеду Пантыфік на верталёце скіруецца ў санктуарый Маці Божай Аглонскай. Там ён узначаліць Эўхарыстыю, падчас якой прамовіць гамілію да вернікаў.
Пасля св. Імшы Папа вернецца ў Рыгу, а адтуль на самалёце — у Вільню.
25 верасня — Эстонія
25 верасня каля 10.00 папа Францішак прыбудзе ў Талін. Пасля традыцыйнага прывітання ён правядзе сустрэчу з прэзідэнтам Эстоніі, прадстаўнікамі грамадзянскай супольнасці і дыпкорпусу ў Прэзідэнцкім палацы.
Акрамя таго, праграма візіту Папы ў Эстонію прадугледжвае экуменічную сустрэчу з моладдзю ў лютэранскай кірхе св. Караля і сустрэчу з супрацоўнікамі каталіцкіх дабрачынных арганізацый у катэдральным касцёле св. Пятра і Паўла.
Затым Святы Айцец узначаліць св. Імшу на плошчы Свабоды Таліна, пасля якой развітаецца з эстонскімі вернікамі і накіруецца ў аэрапорт, адкуль каля сёмай гадзіны вечара вылеціць у Рым.
Плануецца, што каля 21.20 самалёт з Пантыфікам на борце прызямліцца ў рымскім аэрапорце Ciampino.
Візіт у балтыйскія краіны стане для папы Францішка ўжо 24-м падарожжам за межы Італіі.
