![](/3/images/news/2019/03/2019-03-29-crop_510x410_d3_dsc_1763.jpg)
28 сакавіка Святы Айцец прыняў на аўдыенцыі ў Ватыкане Прэзідэнта Літоўскай Рэспублікі Далю Грыбаўскайтэ, пасля чаго яна сустрэлася з кардыналам Дзяржсакратаром П'етро Паралінам.
Як са спасылкай на прэс-службу Святога Пасаду паведаміла беларуская рэдакцыя партала Vatican News, у ходзе шчырых перамоваў былі высока ацэнены добрыя двухбаковыя стасункі і ўнёсак Каталіцкага Касцёла ў жыццё літоўскага грамадства.
Узгадвалася і пра нядаўні візіт Святога Айца ў суседнюю краіну, куды з гэтай нагоды скіравалася таксама вялікая колькасць пілігрымаў з Беларусі.
Абмяркоўваліся некаторыя тэмы, якія датычацца грамадскай і палітычнай сітуацыі ў Літве.
Бакі засяродзіліся таксама на некаторых пытаннях міжнароднага парадку дня, такіх, як мір і бяспека, патрэба ў большай салідарнасці для вырашэння праблем Еўропы і рэгіёну.