Да глыбіні душы засмучаны весткай аб пажары ў гандлёвым цэнтры «Зімовая вішня» ў Кемераве (Расія), Святы Айцец выказаў спачуванне ўсім тым, хто пацярпеў ад гэтай трагедыі.
Даручаючы загінулых, асабліва шматлікіх дзяцей, міласэрнай любові Усемагутнага Бога, Пантыфік запэўнівае ў сваёй малітве за ўсіх тых, хто аплаквае страту дарагіх людзей. Духоўна падтрымліваючы адказных і спецыялістаў экстранных службаў, якія дапамагаюць пацярпелым і вядуць пошук тых, чый лёс пакуль невядомы, Папа просіць для іх Божага благаслаўлення, супакою і суцяшэння.
Папа Францішак таксама скіраваў спецыяльнае пасланне Алену Планэ, біскупу дыяцэзіі Каркасона і Нарбоны (Францыя), на тэрыторыі якой у пятніцу адбыўся тэракт з захопам заложнікаў, што прывёў да чалавечых ахвяраў. У акце насілля, здзейсненым ісламістам, загінулі 4 чалавекі. Сярод загінулых — падпалкоўнік паліцыі Арно Бэльтрам, які аддаў сваё жыццё ў абмен за жыццё заложніка.
У пасланні Святы Айцец выказаў свой боль ад таго, што адбылося ў Каркасоне і Трэбе, даручыў Божай міласэрнасці ахвяраў і засведчыў, што падзяляе боль іх блізкіх. Асаблівым чынам Пантыфік адзначыў велікадушны і геройскі ўчынак афіцэра паліцыі, які аддаў сваё жыццё дзеля таго, каб уратаваць іншых людзей.
«Я выказваю маю салідарнасць з параненымі і іх сем’ямі, а таксама з усімі, каго закранула гэтая трагедыя, просячы для іх у Пана Бога ўмацавання і суцяшэння. Я яшчэ раз асуджаю падобныя акты бязглуздага насілля, якія прычыняюць так шмат пакутаў, і палымяна прашу Бога аб дары міру і благаслаўлення для сем’яў і ўсіх французаў», — напісаў у сваім пасланні Святы Айцец.
