14 лютага, у першы дзень Вялікага посту, Святы Айцец асаблівым чынам звярнуўся да моладзі, хворых і маладажонаў.
Падчас традыцыйнай агульнай аўдыенцыі, якая сёння, у Папяльцовую сераду, прайшла на плошчы святога Пятра пад лютаўскаю рымскаю імжою, папа Францішак благаславіў вернікаў на пачатак велікапоснага шляху, мэта якога ў тым, каб наблізіцца да Бога і Ягонай любові.
«Сёння, у Папяльцовую сераду, распачынаецца шлях Вялікага посту. Дарагая моладзь, жадаю вам пражыць гэты час ласкі як вяртанне да любові Айца, які чакае ўсіх з распасцёртымі абдымкамі. Дарагія хворыя, я заклікаю вас ахвяраваць вашыя цярпенні за навяртанне тых, хто жыве далёка ад веры; а вас, дарагія маладажоны, я заахвочваю будаваць вашы новаствораныя сем’і на скале Божай любові».
