Першы месяц новага года будзе вельмі насычаны падзеямі з удзелам Святога Айца. Папа Францішак будзе маліцца аб міры, удзеліць сакрамэнт хросту дзецям, сустрэнецца з дыпламатамі і наведае Лацінскую Амерыку.
На пачатку 2018 г. Папа будзе цэлебраваць святыя Імшы: 1 студзеня, ва ўрачыстасць Святой Багародзіцы Марыі і Сусветны дзень міру; 6 студзеня, ва ўрачыстасць Аб’яўлення Пана; 7 студзеня, ва ўрачыстасць Хросту Пана.
Апошняя Эўхарыстыя будзе праходзіць у Сікстынскай капэле. Падчас яе Пантыфік удзеліць сакрамэнт хросту дзецям ватыканскіх служачых.
8 студзеня адбудзецца традыцыйная сустрэча Святога Айца з дыпламатамі, акрэдытаванымі пры Апостальскай Сталіцы, падчас якой ён звернецца з прамовай аб важнейшых падзеях у свеце.
14 студзеня ў Ватыкане Папа ўзначаліць Эўхарыстыю з нагоды Сусветнага дня мігранта і бежанца, які адзначаецца ў Каталіцкім Касцёле ў другую звычайную нядзелю літургічнага года.
На наступны дзень, 15 студзеня, Пантыфік распачне сваё 22-е Апостальскае падарожжа, у рамках якога наведае дзве паўднёваамерыканскія краіны: Чылі і Перу. У Ватыкан ён вернецца толькі 22 студзеня.
У свята навяртання св. Паўла, якое адзначаецца 25 студзеня, папа Францішак узначаліць урачыстыя Нешпары ў рымскай базыліцы св. Паўла за Мурамі. Па традыцыі ў гэтым набажэнстве прымуць удзел прадстаўнікі розных хрысціянскіх канфесій, паколькі яно адбываецца на заканчэнне Тыдня малітвы аб еднасці хрысціян.
Агульныя аўдыенцыі ў наступным месяцы пройдуць 3, 10, 24 і 31 студзеня, а сустрэчы на малітве «Анёл Панскі» на плошчы св. Пятра адбудуцца 1, 6, 7, 14 і 28 студзеня.
