Сваю заклапочанасць з нагоды магчымых наступстваў прызнання Дональдам Трампам Іерусаліма ў якасці адзінай сталіцы Ізраіля выказаў Дзяржаўны Сакратар Папы Рымскага кардынал П’етро Паралін. У інтэрв’ю італьянскаму каталіцкаму тэлебачанню TV2000 кардынал сказаў, што, на яго думку, «сітуацыя выклікае трывогу».
«Мы спадзяёмся, што не пачнецца працэс, які прывядзе да напружанасці і насілля», — адзначыў бліжэйшы супрацоўнік Пантыфіка. «Будзем спадзявацца, што мудрасць і асцярожнасць возьмуць верх, да чаго заклікаў Папа ў сваім звароце. Несумненна, гэта рашэнне [прызнанне Дональдам Трампам Іерусаліма сталіцай Ізраіля — рэд.] вельмі ўскладніла сітуацыю», — дадаў Дзяржсакратар.
Сваю заклапочанасць з нагоды наступстваў рашэння адміністрацыі ЗША выказаў таксама адміністратар Лацінскага Патрыярхату арцыбіскуп П’ербаціста Піцабала. У заяве італьянскага агенцтва ANSA іерарх заявіў аб сваёй перакананасці ў тым, што Іерусалім «можа быць сімвалам двух народаў», палесцінскага і ізраільскага. Ініцыятыва Трампа, на яго думку, «павялічыць нянавісць, насілле і пакуты, як у Іерусаліме, так і па ўсёй Святой Зямлі».
