Падчас рэстаўрацыйных прац у славутай Зале Канстанціна ў Апостальскім палацы ў Ватыкане выявілі дзве алегарычныя фігуры, якія, мяркуючы па ўсім, належаць пэндзлю Рафаэля і былі напісаны незадоўга да яго заўчаснай смерці ў 1520 годзе.
Пра гэта паведамляе сайт Смітсанаўскага інстытута.
У пачатку XVI стагоддзя папа Юлій ІІ даручыў італьянскаму мастаку Рафаэлю спраектаваць Залу Канстанціна — комнату для прыёмаў у папскім палацы ў Ватыкане. Рафаэль зрабіў накіды планаў залы, але раптоўна памёр у 1520 г., не паспеўшы выканаць даручэнне.
Працу над маляўнічым убраннем залы даручылі вучням Рафаэля — так да сёння лічылі эксперты. Але рэстаўратары, якія працуюць над аднаўленнем першапачатковага аблічча Залы Канстанціна, не так даўно выявілі фрагменты фрэскі, якія, магчыма, былі напісаны не вучнямі Рафаэля, а самім майстрам.
Апошнія працы майстра: «Сяброўства» і «Правасуддзе»
Зала Канстанціна ўпрыгожана чатырма фрэскамі, на якіх адлюстраваны значныя падзеі жыцця першага рымскага імператара Канстанціна, які прыняў хрысціянства. Сярод іх «Бачанне Крыжа», «Бітва Канстанціна і Максенцыя», «Хрост Канстанціна» і «Ахвяраванне Рыму».
Падчас рэстаўрацыі фрэскі «Бачанне Крыжа» даследчыкі расчысцілі алегарычную фігуру «Сяброўства», якая знаходзіцца з краю кампазіцыі. Яна паказвае Канстанціна, які прадчуваў сваю перамогу над Максенцыем.
Другая фігура, якую прыпісваюць Рафаэлю, — алегорыя Правасуддзя. Змешчана яна з краю кампазіцыі «Бітва Канстанціна і Максенцыя».
Італьянская газета La Stampa першая паведаміла пра знойдзеныя фігуры са спасылкай на відэа, змешчанае на канале YouTube Ватыкана. Як патлумачыў газеце кіраўнік тэхнічных і навуковых даследаванняў у Музеях Ватыкана мастацтвазнаўца Арнольд Несельрат, крыніцы XVI стагоддзя сцвярджаюць, што Рафаэль перад сваёй смерцю паспеў напісаць дзве фігуры на фрэсках у Зале Канстанціна.
«Паводле крыніц, у гэтых дзвюх фігур значна больш высокая якасць, чым у тых, што вакол іх», — прыводзіць выданне словы Несельрата.
Тым не менш, эксперты не былі ўпэўнены ў аўтарстве Рафаэля адносна ўзгаданых алегарычных фігур, пакуль у сакавіку 2015 г. не пачаліся рэстаўрацыйныя працы, і тыповая для Рафаэля тэхніка жывапісу на гэтых дзвюх фігурах стала відавочнай.
У іншых месцах Ватыкана ўнёсак Рафаэля больш заўважны. Маляўнічыя фрэскі мастака, у тым ліку знакамітая Афінская школа, упрыгожваюць сцены трох іншых пакояў у Папскім палацы.
